SHILLONG, Nailur 01: Ka Phoebe Dale Nongrum, ka nongñiah kali motorsport jong ka Meghalaya, ka la thaw ïa ka histori ha kawei na ki jingïakob ba pawnam jong ka Dakshin Dare Cross Country Rally 2025 da kaba long ka kynthei kaba nyngkong eh ha ka histori jong kane ka lympung ban ïoh ban ïoh kiew rynsan khur khusnam haduh lai sien.
Haba shim bynta ha ka jingïakhun kaba shyrkhei kaba san sngi, kaba la sdang na Bengaluru, bad ïaid lyngba ka jylla Andhra Pradesh, bad wanphai biang sha Bengaluru, ka Phoebe ka la pyni ïa ka jingtbit bad ïa ka sap kaba kyrpang ryngkat bad u nongpynïaid (navigator) jong ka, u Venu Kumar na Coimbatore, uba la bat lahduh hynriew sien ha ka Two-Wheeler Rally.
Ka jingtrei shitom jong ka Phoebe ka la pynlong ïa ka ban ïoh lai tylli ki kyrdan ha katei ka lympung ïakop: da kaba wan kyrdan ba lai (3rd Place) ha ka T1 Modified Car Category, nangta ka la wan ba nyngkong ha ka thup jong ki kynthei (Ladies Category), bad ruh ban poi ha ka kyrdan ba saw (4th Place) ha ka Overall Standing.
Ha kane ka jingïakop tang kiba wan ha ka thup kyrdan Top 5 ki ïoh ban kiew rynsan khur ïa ki khusnam jop.
Kane ka jingjop kaba sah jingkynmaw, ym tang ba ka pynskhem ïa ka jaka jong ka Phoebe ha ka jingïalehkai motorsport jong ka ri India hynrei ka buh ruh ïa ka nongrim kaba thymmai na ka bynta ki kynthei nongñiah kali rally ha ka ri. Ka jingjop jong ka-ka pynpaw ïa ka jingkiew bad jingktah jong ki kynthei kaba nangroi ha ka pyrthei ha ka motorsport.
Haba kren halor kane ka jingjop, ka Phoebe ka la pynpaw ïa ka jingsngewnguh ïa u nongpynïaid (navigator) jong ka, ïa ka kynhun, bad ki nongkyrshan, da kaba ong ba kane ka jingjop ka dei shaphang ka jingïatreilang bad ka jingïaishah kumba ka long shaphang ka jingkut jingmut da lade shimet.
Na ka liang jong ka Meghalaya Motorsports Society ka ai khublei ïa ka Phoebe Dale Nongrum bad ïa u Venu Kumar na ka bynta ka jingïalehkai kaba kyrpang jong ki bad ruh na ka bynta ka jingwanrah ïa ka jingsarong ïa ka imlang ka sahlang jong ki nonglehkai motorsport jong ka thaiñ bad ka ri baroh kawei.
