Ban shngaiñ ki paidbah, pynstet ïa ka jingpynbeit pud ha ka wat kaba ar: President HSPDP

Shillong, Nailar 31 : Ka HSPDP kaba dei ka party kaba donlang ha ka sorkar synrop ka la banjur ïa ka jingdonkam kyrkieh ban pynbeit noh ïa u pud u sam ha ki hynriew tylli kiwei ki jaka kajia pud kaba pynhap ha ka kylla kaba ar.
Haba kren bad ki lad pathai khubor dang shen u President ka party Bah KP Pangniang u la ong ruh ba ïa kane ka kam lada nang pynslem kiban shah ktah dei ki paidbah kiba sah ha ki khappud jong ka Meghalaya bad Assam.
U President u la ïathuh ruh ba na ka por sha ka por na ka liang ka party ka ju wan ban pynkynmaw ïa ka sorkar ba ka long kaba donkam ban pynstet ïa kane ka jingpynbeit pud hapdeng ka Meghalaya bad Assam. Shuh shuh u ong ruh ba ka jingkyntu jong u ïa ka sorkar ban pynstet ïa kane ka kam kadei hadien ba ki ïohi ba kane ka kam ka ïaid suki bha mynta namar ka Assam ka dang pynkhreh ïa ka elekshon MLA.
Da kaba pynpaw ba na ka liang ka party kan ym shong kli kti ban buddien ïa kane ka kam, u Bah KP Pangniang u la ïathuh ruh ba kum uwei na ki dkhot jong ka Regional Committee u kwah ban ïai ban bad ban pynkynmaw khlem sangeh ïa ka sorkar halor kane ka bynta.
Shuh shuh u ong ba haba phai sha ka kylla kaba nyngkong, ki la sakhi ba ki hynriew tylli ki jaka kiba la dep ban pynbeit ha ka kylla kaba nyngkong ka la long kaba seisoh da ka jingïatrei lang ryngkat ryngkat bad ki ar tylli ki jylla bad ruh ki Myntri Rangbah jong ki. “Kumta ngi khmih lynti ba ki hynriew tylli ki jaka kiba dang sah pat yn lah ban pynbeit noh mardor ha ka kylla kaba ar,” u la bynrap biang.