Haduh 1. 93 klur la plie ïa u mawnongrim ka projek tynrai ki 6 tylli ki Seiñ Raij

Jowai, Nailar 31: Ka lehñiam shad Behdeiñkhlam jong ka Seiñ Raij Mukhla mynta u snem ka la poi sha kaba kut ha ka sngi U Blei h pung Aitnar Mukhla hapdeng ka jingïaidbeit ïaid ryntih bad ka jingiphuh iphieng da kaba pyndep ïa ki jingleh ñiam bapher bapher, Ka shad Behdeiñkhlam jong ka Seiñ Raij Mukhla ka dei ruh ka Behdeiñkhlam ha ri Lum Jaiñtia kaba khatduh jong u snem.
La sdang ïa ka lehñiam Behdeiñkhlam naduh ka por mynstep ha kaba la don ka jingkynting ïa ki Deingkhlam ha ‘Iung Blai’ bad ka shad ka kñia da ki Waheh, katba ha ka por mynsngi la don ka jingïakynduh ki rong ki rup ha madan Slotmasi bad ka jingpynpoi ïa ki Diengkhlam bad ki rot 14 tylli ha Wah Biar (Aitnar).
Ki khun ka Seiñ Raij Mukhla ki la wanrah ïa ka rot ha pung Aitnar ha ryngkat ki khubor bapher bapher. Na ka liang ka Seiñ Raij Mukhla ka kyrmen skhem lyngba ka jingpyndep ïa kane ka lehñiam kan wanrah ïa ka bha ka miat bad ka roi ka par ha baroh ki liang.
Ha kane ka sngi pynkut ïa ka Behdieñkhlam ka Seiñ Raij Mukhla la sakhi lang da u Symbud Myntri Rangbah ka Sorkar Jylla u Bah Sniawbhalang Dhar, katba u Myntri Khynnah ka Sorkar Pdeng uba khhmih ia ka Ministry of DoNER u Dr. Sukanta Majumdar u la shu phah ia u kyrwoh ba la pyni paidbah ha ka Screen.
Nalor kine la sakhi lang da u MLA ka Jowai Constituency u Bah Wailadmiki Shylla, u Sunil V Deodhar Social Worker, u Superintendent of Police ka West Jaiñtia Hills District, u Dolloi ka Elaka Jowai Bah Puramon Kynjing, ki MDC, ki waheh Wasan jong ka Raij nalor kiwei kiwei.
La plie ruh ïa u mawnongrim jong ka project “Construction of Cultural Infrastructure of 6 (Six) Seiñ Raij in East bad West Jaiñtia Hills District” ba kynthup ïa ka Tuber, Ialong, Mukhla, Muthlong, Sohkymphor bad Chyrmang ha ka jingmang pisa kaba T. 1,93,08,034.00.