Nongpoh, Nailar 31: Ki nongïalam ka Ri-Bhoi Youth Federation ha ka sngi Saitjaiñ ki la ïoh ban pynskhem ïa ki nongïalam ba thymmai ka Nongpoh Circle na ka bynta u snem 2025-28 hadien ba ka samoi treikam jong ki nongïalam barim ka la kut noh, ha ka jingïalang bala long ha ophis treikam ka seng ha Saiden.
Ki nongïalam ba thymmai jong ka RBYF Nongpoh Circle kiba la shah pynskhem thymmai ki kynthup ïa u samla Alberto Nongsiej President, Wanpyndapskhem Mawlieh Vice President, Me-embok Shangpliang General Secretary, Shanborlang Mawphlang Assistant General Secretary, Bankerlang Sulein Finance Secretary nalor kiwei kiwei de ki nongkitkam bad dkhot ka Executive Committee bad ïa kitei ki nongïalam la pynskhem da u Bah Liander Nongshli Working President ka sengkmie.
Ha kane ka sngi ka jingpynskhem ïa kitei ki nongïalam ba thymmai ka Nongpoh circle la sakhi ruh da ka jingïadon ryngkat ki nongïalam ka sengkmie naduh u samla Denis M Syngkli, Assistant General Secretary ka sengkmie, u samla RJ Thangkhiew, Political Secretary, u samla Bawan Marwein, Finance Secretary, u samla Devan Warjri, Transport Secretary lem bad kiwei kiwei de.
Shuh shuh ha kane ka sngi, ki nongïalam jong ka seng kiba kynthup ïa u Bah Liandar Nongshli, u samla Denis M. Syngkli bad kiwei kiwei pat haba ai jingkren ki la kyrpad ïa ki nongïalam ba thymmai jong ka Nongpoh Circle ba kin shimkhia ha ka kamram jongki, ban trei shitom bad ban pynkhlaiñ shuh shuh ïa ka seng na ka bynta ka ri bad ka jaidbynriew.
Ki la pynkynmaw ruh ba ka Nongpoh Circle ka dei ka shlem ba la thaw bad la seng naduh mynshwa, kaba hadien pat la pynim biang ha u snem 2008 hapoh ka jingïalam u samla Denis Syngkli kum u President. Kumta ki nongïalam ba thymmai ki dei ban long kiba don jingkitkhlieh, kiba kohnguh bad kiba kloi ban len lade na ka bynta ka seng lyngba ka jingshakri kaba pura met bad mynsiem ban kyntiew ïa ka jaidbynriew.
Ha kajuh ka por, u Bah Liandar Nongshli u la kyntu ruh ïa ki nongïalam bad ki dkhot ba thymmai ba kin trei katkum ki thong bad nongrim jong ka seng ym ban pynsniew ïa ka kyrteng ka seng hynrei ba kin long kiba kitkhlieh bad shim bynta ban kyntiew ïa ka imlang sahlang.
