SHILLONG, Nailar 31: Kum shi bynta ban rakhe ïa ka National Sports Day 2025 ha ka jingkynmaw burom ïa u khlur ïalehkai hockey ka ri India u Dhyan Chand bad kumjuh ruh ban ïatreilang ban wanrah ka koit ka khiah hapoh ka imlang sahlang, ka Nongthymmai Sports & Cultural Club kala pynlong ïa ka ‘Fit Nongthymmai Movement 2025’.
Kane ka prokram jong ka NS&CC ka kynthup ïa ka jingïakop mareh lane ka marathon. ïa kane ka jingïakop mareh lawan ban kaweh lama da u Bah Winston Tony Lyngdoh, MDC ka thaiñ, uba long u kongsan. Shwa ban sdang ïa ka jingmareh, la ïoh ïa ka jing pynbam smai ïa ka FIT INDIA Pledge.
Haba ai jingkren, u Bah Winston Tony u la ai jingïaroh ïa ka Sports Club kaba pynlong ïa kane ka Marathon kaba long kaba kongsan ha ka jingim ban long kiba koit kiba khiah. U pynpaw ruh ka jingsngewkmen ban ïohi ïa ki hep barit bad kumjuh ruh ïa i longkmie iba la iaw bha ka rta ban ïashim bynta ha kane ka jingmareh da kaba pynshlur ruh ïa baroh ba kin bteng ban shim bynta ha ki prokram jong kane ka Sports Club ha ki sngi ban wan.
Ha kane ka sngi la ïoh ban batai ruh ha kaba ïadei bad ki jingktah kiba bha ha ka jingkilan met na u Bah Kyrshan Marbaniang. La pynbud pat sa ka jingkren ai nuksa bad pynshlur ïa ki nongwan mareh da ka Kong Darisha Iangjiuh, ka nongmareh kaba la mihkhmat ïa ka jylla bad ka Ri India.
Ha kane ka sngi, la ïadon ryngkat ruh u Bah S.B Kharshandi, Rangbah Shnong, Dorbar Shnong Lawjynriew.
Ha kane ka Fit Nongthymmai Movement la sakhi ïa ka jingïashim bynta jong kiba bun naduh ki khynnah skul, samla shnong kynthei bad shynrang bad kumjuh ruh ki rangbah lem bad ki longkmie jong ka Shnong Nongthymmai kiba hap hapoh ka jylli treikam jong ka sports club.
Na ka liang jong ka Sports club ka pynpaw ka jingsngewnuh ruh ïa ka Nongthymmai Urban Health Centre kaba la ïarap ha ka liang ka medical bad safety, Ka Shillong Traffic Police, Madanrting Branch kaba la ïarap peit ïa ka Traffic, ka KSU, Nongthymmai Circle kaba la ïaraplang ïa ki Volunteer bad kumjuh ruh ïa ki Seng Samla Shnong Nongshilliang, Dum Dum, Nongkhyriem, Rangbah Dong Jyllishop bad kiwei kiwei.
U heprit Melamshuwa Lamare, ba dang 4 snem, u la ïohpdiang ïa ka khusnam nongïashim bynta ba dang khynnah tam ha kane ka sngi, katba i Mei-ieid Mary Margareth Khyriem i la long u nongïashim bynta iba la tymmen tam, kata ha ka rta ba 79 snem.
