Lahduh ka Mawkriah West ha ka SSA Third Division FL 2025; pynliem da 3 kol ïa ka Umlyngka ha ka final

SHILLONG, Nailar 31: Ka Mawkriah West SC ka la ïohrah ïa ka nam lahduh jong ka lympung ‘Shillong Sports Association Third Division FL 2025 hadien ba ka la pynliem noh ïa ka Umlyngka SC da 3-0 kol ha ka jingïakhun ïa ka phainal ha madan First Ground-SSA Stadium, Polo, ha ka sngin Saitjaiñ.
Kine ki lai tylli ki kol la thep da u Honour Lucky Nongbri (18′), u Hostarfield Kharbudnah (47′) bad u Insporjoy Rynjah (89′).
Shuwa kane, baroh arliang ki la dep ban pynthikna ïa ka jingkiew kyrdan sha ka Second Division jong u snem ban wan da kaba rung sha ka phainal hynrei ka jingïakhun ha ka sngi Saitjaiñ kadei tang ban jam sha katei ka kyrdan ryngkat bad ka khusnam lahduh. Ka madan ka la dap da ki paidbah, ha kaba ki nongkyrshan jong ka Umlyngka ki la paw ba ki kham bun paid ban ïa ki nongkyrshan jong ka Mawkriah West. Wat la katta ruh, ka Umlyngka ka la shah pynsngap jar dang kloi, hadien ba u Honor Lucky u la thep da ka khlieh ïa ka kol ba nyngkong hapoh 20 minit.
Watla ki la don katto katne ki kabu ba paka hynrei ka jingïakhun ha ka kylla step ka la neh kumjuh ha kaba ka Mawkriah West ka la pynneh ïa ka kol lamkhmat da 1-0.
Ka Umlyngka ka dang don ka jingkyrmen ban wanphai ha ka kylla miet hynrei ka la shah pynkyndit hadien ba u Hostarfield u la pynkhih ïa ka kol tang hapoh 2 minit ba la ïaid ka por kaba la pynjlan ïa ka kol lamkhmat da 2 kol na ka bynta ka Mawkriah West. Ka kol kaba lai ka la long kaba khlem poi pyrkhat. Haba la ïoh ïa ka free-kick, ka Mawkriah West ka la pynrung tang ïa uwei u rang hapoh phyllaw kol jong ka Umlyngka – u Insporjoy – bad u la shim ïa ka kabu ba la wan ha u hadien ba u nongap kol u Berith Nongbri u khlem shym la lah ban bat skhem ïa ka bol.
Kum ka lahduh ka Mawkriah West ka la ïohpdiang ïa ka song khusnam kaba T. 80,000, katba ka Umlyngka kaba wan ba ar (runners-up) ka la ïohpdiang ïa ka song pisa kaba T.40,000. Nalor kane la sam ruh ïa ki khusnam shimet, ha kaba u Sunshine u la khur ïa ka nam ‘Player of the Final’, katba u Wanborlang Lyngdoh Nongbri jong ka Umrynjah u la khur ïa ka nam ‘Top Scorer’ da kaba thep 7 kol.
Ha kane ka sngi la ïadon lang ki dkhot ba la kham rangbah jong ka SRGT, u Wallamphang Roy bad u Danny M Pariat, bad u President ka Meghalaya Football Association u Bah Hamletson Dohling ryngkat bad ki dkhot ba kham rangbah jong ka SSA.