Jowai, Nailar 30: Ka jingïalehkai phubol bala pynïaid da ka West Jaiñtia District Sports Association (WJDSA) kaba la long ha ka 30 tarik u Nailar haki ar tylli ki kyrdan kata ka ‘5th Adelbert Memorial Trophy 3rd Division Football 2025 bad ka ‘8th Debo Shullai Memorial Trophy 2nd Division Football 2025 bala pynlong ha madan Kiang Nangbah Stadium Dongmihsngi, Jowai.
Ka jingïakhun ba nyngkong haka kyrdan 3rd Division la sakhi ïa ka West Madan Mustem kaba la pynliem noh da 3-1 kol ïa ka Chyrmang Wah SC. Ki kol na ka West Madan Mustem la thep da u Sumi o Tariang (6’), bad u Nineciful Shylla (48 & 55). Katba ka shikol na ka Chyrmang Wah la thep da u Apros Dkhar (18’).
Ka jingïakhun hapdeng ka Loomiongkjam bad ka Mookaswan Dongneiñ la hap ban pynsangeh noh na ka daw ka jingjur u slap.
Haba phai pat sha ka jingïakhun jong ka 2nd Division ka Khliehmynkrem kala pynliem suk da 5-0 kol ïa ka Caroline Colony. U Marle Khlem (1, 72 & 79’) u la thep hat trik, nangta u Wanskhem Khlem (3’) bad u Niwon Syad (51’) ki la thep mar kawei.
