Don ki kynhun kiba leh politik ha kyrteng ka niam ban pyntlot bor ïa ka BJP ha Meghalaya: M. Kharkrang

Shillong, Nailar 30 : U nongai ktien ka BJP ha ka jylla Bah M Kharkrang u la ong ba ka jingleh politik ha ka kyrteng ka niam da ki party ba pyrshah ïa ka BJP ka dei ka mat kaba ktah bha ïa ka party ba kan ïoh ïa ka jingshaniah na ki paidbah ka jylla.
Haba kren bad ki lad pathai khubor hadien ka jingïalang jong ka party ha kane ka sngi Saitjain, u Bah Kharkrang u la ong ba ki la ïa kren ruh ïa kane ka ishu ba kumno ka party kan lah ban ïathuh tyngeh.
“Na kaei kaba nga ïohi, ka jingeh kaba ka BJP ha Meghalaya ka kynduh ka dei beit na ka jingleh politik ha kyrteng ka niam da kito ki party kiba long pyrshah ïa ka party jongngi,” u la ong da kaba bynrap ba lada ki paidbah ki bishar bniah ïa ka, khlem artatien kin sa ïoh ïa ka jingshisha.
Ha katei ka jingïalang kaba kongsan bha kaba la wan ruh naduh ki riewshemphang na Delhi, ka party ka la ïatai sani bha ruh kumno ban pynkhlaiñ ïa ka jingtreikam ha ki shnong ki thaw ne ka jingtreikam ryngkat ryngkat naduh tynrai bad ki paidbah.
Katkum ka jingong jong u, ha kane ka jingïalang la ïakren ruh kumno ba ka party kan ïoh ïa ka jingshanïah na ki paidbah ha ki shnong ki thaw kaba long katkum ka thong jong u Myntri Rangbahduh ka Ri.