Lap ki pulit ïa ka metïap ba la pyut jong uwei u rangbah briew napoh kawei ka thliew

Shillong, Nailar 28: U Superintendent of Police, ka East Jaiñtia Hills Khliehriat u la pyntip ba ha ka 17 tarik mynta u bnai, ha ka por kumba 1:00 baje nohphai sngi, ki pulit ki la ïoh ka jingpyntip na u Rangbah shnong ka shnong Khliehriat East, East Jaiñtia Hills District ba ki nongshong shnong ki la lap ïa kawei ka metïap kaba la pyut kaba per ha kawei ka thliew kaba la shu iehshrah kaba don hajan ka Indian Petrol Pump, ha ka shnong Khliehriat East kaba don sha lyndet ka S. S. Motor shop.
Ha kaba ïadei bad kane u SI. ASR Lakiang da ka jingsynran lang ki nongtrei la phah ba kin pynlong ka jingtohkit bad hadien ba la dep baroh ki kam na ka liang ki pulit ki la khwai noh ïa ka metïap napoh katei ka thliew bad kumba ju long, la pyndep ïa ki jingtohkit ha katei hi ka jaka ha ka jingdonlang kiba sakhi.
Ïa kane ka metïap la rah noh sha Khliehriat CHC na ka bynta ban pyndep ïa ka Postmortem ban lap ïa ka daw jong ka jingïap.
Shuh shuh haba tohkit ïa ki nongshong shnong ym don uwei ruh uba ithuh ïa utei u lanot ne ba kin ai kano kano ka jingtip jong ka jingithuh ïa katei ka metïap.