Sa tang shiteng snem tam ei ei ba ka MLA Election kan sa poi noh ha Meghalaya.La ïakhih khohreh ki party ban wad ia la u jong u candidate na man la ki constituency. Kumjuh ruh,ki candidate kiba kwah ban ïaleh election ki la sdang wad na kano ka party ba ki i bang ban ïoh tiket.
Hynrei,ha lyndet jong kane baroh, dei ka pisa kaba kren briew ha ki party bad kumjuh ruh ha u candidate.Ki party kiba kwah candidate na ki constituency bapher bapher kin kylli shwa ïa uta u candidate, uba don pisa ne em ban ai tiket ïa u ne ia ka. Lada dei uba don lak don klur,kata,kin kylli pat katno klur un pyllut lada ai tiket ïa u ne ïa ka ha ka election.Lada jia ba u/ka bym don pisa pat,kata, ki la kren jem daw lypa ba kum uta u candidate kim ai tiket satia namar um lah poi satia sha ka thong.
Kumjuh ruh,lada u candidate u kwah ban ïaleh election,un kylli shwa na ki nongialam ka party haduh katno lak ne katno klur ka party ka lah ban ai bai seng ïa u/ka ha ka election lada u ïaleh bad ïoh tiket na kata ka party.Lada sngewthuh ba kata ka party kam lah ai bai seng shibun,kata,kin phai noh ka khmat sha kiwei pat ki party kiba lah ban pynkiew bai seng ïa ki shibun shibun shuh shuh. Kum kine ki rukom pyrkhat ki ïai rung ïai mih ha man la ki party bad ki candidate ha shwa ban pynbna candidate na ki constituency bapher bapher.
Lada phai sha ki paidbah nongthep vote man ki jaka thep vote ruh,ka rukom pyrkhat jongki kalong hi kumjuh.Ki nongkyrshan kin kylli shwa ïa ki nongialam party na man la ki constituency bapher bapher ïano ki mut ban pynieng candidate mynta ka sien ban ïaleh pyrshah ïa ki sitting MLA. Ka jubab ka long hi kajuh.Lada ki nongialam party ki ong ïa uta uta,bad ba ki la tip lypa ba udei u bym lak don klur, kata,ki paidbah ruh ki la kren jem daw lypa bad pynduh mynsiem artad ba kin kyrshan noh sha wei ba u dei u candidate u bym don pisa.Lada dei pat ba ki nongïalam party ki tyrwa da uba don klur,kata te ki la shongshit khlehbiej bad lamwir syndon. Ki ai mynsiem ba kiwei kiwei kiba ju kyrshan mynswa na kiwei pat ki party ruh,mynta ka sien te kin wan kyrshan lang sha u.Wei la ong ban ïaleh uba don pisa,ki nongialam party kin wan man la ka taiew sha ïing u candidate bad leh mynleh bad act ruh hakhmat u candidate la kumba ki dei ki nongïalam ba pawkhmat ba lah ban pynngeit bad ïoh nongkyrshan bun hajar vote.Kine kidei ki buit pynngeit ia u candidate ban kham ïoh kamai pisa shi kit shi kit man ka sien ba leit mih sha u candidate. Lada ka long ka rukom pyrkhat ka party, u candidate bad u paidbah ha kane ka rukom,ka synshar khadar ka la kylla long pynban noh ka ïew ïadie ia thied ne business kaba heh tam ha ka por election.Kat uba kham don pisa,kata ruh u kham ïoh kham bun ki mar.Kiba duna pisa pat,kin ioh mar ruh khyndiat khynsoit. Dei ka pisa kaba pynsniew dur bad pynjot ïa ka saiñ hima sima.Ki paidbah nong vote ruh kin shu leh mynleh kohnguh kput la kum ki angel ha bneng.Hapoh hapoh pat ki dei ki kruin bam pisa kiba shyrkhei bha haduh ban pynkhyllem syndon ia u diengbah dieng san khlem poi pyrkhat khlem ïohi dak pyut nangno nangno ruh ha uta u diengbah.
Lada baroh baroh ka rukom pyrkhat pyrdaiñ ha ka longbriew man briew ka la hiar haduh katne, naduh ki party,ki candidate haduh ka rukom pyrkhat ki riew paidbah,ym lah shuh ban pynbha ne maramot ïa ka sain hima sima jong ka ri jongngi hynrei ka jingjot,ka jingma bad ka jingshyrkhei kan ap lypa ha ki khyndiat snem kiban wan.
