Shillong, Jylliew, 27: Ïa ka jaka jngoh kai ha Mawryngkhang, Wahkhen, Pynursla la pynsahngeh shwa kumba ar bnai eiei kata naduh u bnai Naitung haduh Nailar, 2022 namarba dang dei ki bnai ba dang jur bha u lapbah.
Katkum u kyrwoh ba la phah da ka Tourism Promoter Trekking Society, Wahkhen, la pyntip ba ka jingkhang shwa shipor ïa kane ka jaka jngohkai ka long hadien ba ka umbah umsan ka la rong noh ïa ka jingkieng siej ha Wah Rew bad ka jingtwa kaba jur bha ha ka lynti ban leit sha Mawryngkhang Treking Point ha kine ki taiew ba ladep na ka jingther palat u ‘lapbah lapsan ka la pynlong ïa kane ka jaka jngohkai ba kam long ïaid shuh da kumwei pat.
Na ka bynta ka jingshngaiñ bad ban lait ruh na kino kino ki jingma jingmynsaw sha katei ka jaka jngoh kai,ka Tourism Promoter Trekking Society, Wahkhen ka la rai ban pynsahngeh shwa shi por kumba ar bnai eiei khnang ban ïoh shna pynbha biang ïa katei ka jaka bad ba ki Tourist kin ïoh biang ka lad ban leit jngoh ïa katei ka jaka ynda la kham duna u slap.
La kyrpad ïa ki Tourist ba kin ïai shah lang bad ka Society halor kane tad haduh ban kan da long biang kaba shngaiñ bad kaba lait na ki jingma bad jingmynsaw.
