Nongstoiñ, Nailar 28: Ka Ophis jong ka Deputy Commissioner, Eastern West Khasi Hills District, ka la bthah ïa baroh ki nongpyndonkam ïa ka Aadhaar card ba ki dei ban download ïa ka Aadhaar QR Code Scanner App ba la pynbiang da ka Unique Identification Authority of India (UIDAI), na ka bynta ban pynsuk ïa ki paidbah ha kaba ïadei bad ka jingai jingtip shaphang ïalade ha kino kino ki por kiba ki donkam.
Ka Aadhaar QR Code Scanner App ka dei kaba buh jingshngaiñ ïa ki nongpyndonkam, ka pynsuk ban pynsted ïa ka jingtreikam. Lyngba u ne u QR Code Scanner App lah ban ïoh ïa baroh ki jingtip kiba dei shaphang u/ka briew u ba dei trai ïa ka Aadhaar card, kaba kynthup naduh ka dur, ka jaka sah, ka kyrteng jong u nongbat ïa u Aadhaar, ka tarik Kha bad ka jinglong kynthei, shynrang ha kaba ki lah ban pynskhem ïa ka jingshisha shaphang ka Aadhaar card jong ki da ka jingdon jong ka jingsoi kyrteng ka UIDAI lyngba ka kor computer.
Ïa u QR Code lah ban Scan da kaba pyndonkam ïa ka Aadhaar QR Code Scanner App kaba don ha ka app store ha ki Android phone bad iOS.
Ka jingpyndonkam ïa kane ka app kan ïada ïa ki paidbah kiba pyndonkam ïa u Aadhaar na kino kino ki kam thok kam shukor bad ki kam thmu beaiñ da kiwei pat.
