Shillong, Jylliew 27 : U Myntri Rangbah ka jylla u Conrad K Sangma u la ïathuh ba shen un sa lum noh ïa ka jingïalang jongka Meghalaya Democratic Alliance (MDA) na ka bynta ban shim da kawei beit ka rai ha kaba ïadei bad ka Election jied President ba thymmai jongka ri India ka ban long ha ka 18 tarik Naitung 2022.
“ Ngan sa khot ïa ka jingïalang ka MDA ha ka por kaba biang bha ban ïakren halor kane ka bynta” ong u Myntri Rangbah.
U la ïathuh ba u la dep ïakren ruh la jan sha baroh ki nongïalam jong ki seng saiñ pyrthei ba ïa synrop lang bad ka sorkar MDA hashwa ba un leit sha Delhi ban leit soi lang kum uwei na ki nongtyrwa ïa ka kyrteng jongka kyrtong ka NDA bad BJP ka Droupadi Murmu.
“ Nga la ïakren bad baroh ki nongïalam ba ïa synrop lang ha ka sorkar kynthup ïa ki MLA Congress bad nga la kyrpad ïa ki ban ïatreilang bad nga la ïathuh ruh ba ngan leit sha Delhi kum u President ka NPP ban ïasoi kum uwei na ki nongtyrwa ïa ka kyrtong jongka NDA bad BJP bad nga la pynpaw ruh ha ki ban ïa kyrshan lang ïa ka khamtam ba ka dei ka jaidbynriew riewlum hynrei wat la katta ruh shen ngan sa lum ïa ka jingïalang halor kane ka kam” ong u Myntri Rangbah.
