Nangjan ka 4th Sohra International Half Marathon, lah ban pynpra ïa ka rekod jong u snem ba la dep

Shillong, Nailar 28: Ka jingpynkhreh ïa ka 4th Sohra International Half Marathon 2025 ka ban sa long ha ka 27 tarik Nailur, ka la ïaid shait shait bad mynta u snem la khmihlynti ba ka jingbun u paid ba ïashim bynta ka lah ban pynpra ïa ka rekod jong u snem ba ladep, ha kaba tad haduh ba la thoh ïa kane ka khubor ki la don palat 6000 tam kiba ladep ban pynrung kyrteng ïalade ban ïashim bynta ha kane ka jingïakop mareh thong.
ïa kane la pynbna da u General Secratary jong ka MSOA u Bah Finely L Pariat haba ai jingkren sha ki lad pathai khubor hynne ka 28 tarik Nailar, 2025, ha ka jingïadonlang u Working President-Bah John F Kharshiing lem bad u Director ka tnad ïalehkai u D.D. Shira.
Kane ka lympung ïakop mareh la pynlong da ka Meghalaya State Olympic Association (MSOA) ha ryngkat ka jingïatreilang bad ka Directorate of Sports & Youth Affairs, jong ka Sorkar Jylla Meghalaya bad ka Meghalaya Athletics Association. La ithuh ruh da ka World Athletics bad Athletics Federation of India.
Haba phaidien, ki don haduh 7,000 ngut ki nongïashim bynta ha u snem ba ladep bad na ka liang jong ki nongpynïaid ki la khmihlynti ba mynta u snem ka jingkheiñ kan kynjoh sha ka 10,000 ngut.
“Tad haduh hynne ka step (28 tarik Nailar, 2025) Ngi la don haduh 6808 ngut kiba la dep ban pynrung kyrteng ïalade, na kine 5538 ngut ki ban shim bynta ha ka Run For Fun (5k),” la pynbna u General Secretary ka MSOA.
Mynta u snem la sakhi ïa ka jingroi ki nongïashim bynta ha ka 21k Elite ha kaba ki don 82 ngut shynrang bad 17 ngut kynthei, ha ka 21K Meghalaya Open – 115 ngut shynrang bad 16 ngut kynthei, ha ka 10K Open (18 snem shaneng) shynrang – 710 bad kynthei – 164 ngut, ha ka 10K Open (40 haduh 54 snem) shynrang – 90 ngut bad kynthei – 46 ngut, nangta ha ka 10K Open (kiba la 55 snem shaneng) shynrang – 19 ngut bad kynthei – 11 ngut.
Mynta u snem la khmihlynti ruh ïa ka jingïashim bynta jong 5 ngut ki nongïakop mareh kiba na dewbah Africa bad 142 ngut kiba nabar jylla.
Ki kyrdan mareh na ka bynta ki shynrang bad kynthei, ki long 21km Elite Open (18 snem shaneng), 21km Open Meghalayan (18 snem shaneng), 10km Open (18-40 snem), 10km Open (40-55 snem), 10km Open (55 snem shaneng) bad ka 5km Fun Run (10 snem shaneng).
Namar kan don ka jingpyrkhing ïa ka ïaid kali ha ka sngi mareh, ki nongpynïaid ki la kyrpad ba baroh ki nongïashim bynta (Shillong) ba ki dei ban bat ïa ka por ban wanpoi ha lane shuwa ka 3 baje mynstep ha State Central Library, Shillong. Ka bos kaba khatduh kan mih ha ka por 4 baje thik mynstep.
Ki nongpynïaid ki la pynbna ruh ba yn ai khusnam kyrpang ruh ïa baroh kiba la palat ïa ka 50 snem kiba la pyndep ïa ka 21K, nangta yn ai jingai sngewbha ruh sha ki 200 ngut kiba pyndep nyngkong ïa ka “Run for Fun” (100 ngut shynrang bad 100 ngut kynthei),
Ka mang tyngka na ka bynta kane ka marathon ka long T.2.97 klur, kaba la pynkiew na ka T.2.3 klur jong u snem ba la dep, bad ka khusnam pisa baroh ka long T 15.50 lak.
Ka por ba khatduh ban thep kyrteng kadei ha ka 10 tarik Nailur, 2025. Na ka bynta ki sopti (21km bad 10km) bad bib number yn sam ha ka 25 bad 26 tarik Nailur ha JN Stadium.
Ki nongïashim bynta kiba na nongbah Shillong bad ki jaka ba marjan kin ïoh ïa ki t-shirt bad ki bib number ha ka 26 tarik Nailur ha JN Stadium, katba kiba na Sohra kin ïoh ha kajuh ka sngi hynrei ha Sohra. Ki surok kiba leit sha Sohra na Shillong kin khang naduh ka por 6 haduh 10 baje mynstep ha ka sngi mareh.
Ka jingmareh kan sdang na Laitsohpliah (kaba jngai kumba 6km na jingkieng Mawkdok) bad kan kut ha Mawsmai (Nohsngithiang Falls viewpoint).