SHILLONG, Nailar 28: Ha ks sien ba nyngkong ka All Meghalaya Kickboxing Association ka la pynbna ba kan pynlong ïa ka lympung ïalehkai ‘1st State Level Kickboxing Championship 2025. ïa kane la pynbna da u President u Bah Samuel Hashah haba ai jingkren sha ki lad pathai khubor ha ka 28 tarik Nailar, 2025.
Ha kane ka sngi u Bah Samuel u la pyntip ba ka synjuk ka la buh ban pynlong ar sngi lynter ïa kane ka championship, kata naduh ka 12 bad 13 tarik Nailur 2025 ha Bharat Scout & Guide shillong.
Ha kaba ïadei bad kane, u Bah Samuel Hashah u la ong ba ka jingpynkhreh ka la ïaid shait shait bad la khmihlynti palat 300 ngut ki nongïashim bynta ha kane ka Championship kaba nyngkong.
“Kiba la dep ban pynrung kyrteng ki la don kumba 250 ngut eiei bad kin dang don ruh ki ban pynrung kyrteng hadien kane namar la ai por khatduh ha 30 tarik Nailar na ka bynta ki khynnah kiba kwah ban ïashim bynta ban pyndep ïa ka jingpynrung kyrteng,” la ong u Bah Samuel.
Shuh shuh u Bah Samuel u la pynpaw ba ki don 9 tylli ki District ki ban wan ïashim bynta ha kane ka Championship, kiba kynthup ïa ka East Jaintia Hills, West Jaintia Hills, Ri-Bhoi District, East Khasi Hills, Eastern West Khasi Hills, West Khasi Hills, South West Khasi Hills, South Garo Hills bad ka East Garo Hills.
Kumta na ka liang jong u Bah Samuel u la kyrpad ïa ki kmie ki kpa ban phah ïa la ki jong ki khun ban wan ïashim bynta ha kane ka Championship.
U la bynrap ruh ba ki khynnah kiba ïashim bynta ha kane ka Championship kidei ban wanpoi noh ha ka jaka ban pynlong ha ka 11 tarik Nailur khnang ban ïoh pyndep ïa jingdonkam baroh, kata naduh ban phiah ïa ki kyrdan katkum ka jingkhia ki nongïalehkai ha kaba na ka liang jong ki nongpynïaid ki la pynbiang ïa ka jaka sah.
Ki khynnah kiba jop ha kane ka State Level Championship kin ïoh ban leit ïa shim bynta ha ka National Kickboxing Championship ka ban sa long ha kine ki bnai ban wan ha Bhubaneshwar.
Kane ka championship ka kynthup ïa 4 tylli ki kyrdan: ba kynthup ïa ka Tiny Tots, Sub junior, Junior bad Senior.
