Shillong, Nailar 27 : Ka HSPDP watla ka donlang ha ka sorkar synrop Meghalaya Democratic Alliance (MDA) hynrei ka la pynkhreh pat ban kynduh ïa u Myntri Rangbah ka Jylla Conrad K Sangma ban ïoh jingshai shuh shuh halor ka jingtyrwa ban ïarap pynsiew tulop ïa ki nongtrei jong ki District Council kiba don ha ka jylla.
Halor kane, u President Rangbah ka HSPDP Bah KP Pangniang ha ka jingïakren bad ki lad pathai khubor u la ong, “Lada peit na ka jinghiran pisa jong ka Council la sngewdei hi ba ka sorkar kan ïarap ïa ki District Council baroh lai tylli. Hynrei kum ka party ngi hap ban tih janai halor kane kumta na ka liang ka party ngin sa kynduh ïa u Myntri Rangbah ban shai shuh shuh halor kane.
Nangta u ong ruh ba kum ka party ki kwah ba kane ka jingïarap kaba wan na ka sorkar sha ki council kam dei satia ban pynduh noh pat ïa ka jinglong kyrpang bad ka iktiar jong ka District Council kumba la pynkupbor da ka Khyrnit kaba Hynriew.
“Ngi ruh ngi kwah ba ki Council ruh kin lah ban trei ha kata ka rukom ba kin lah ban ieng ha la ki jong ki kjat bad ym da dei eh ban shu ap khmih lynti na ka sorkar,” bynrap biang u Bah Pangniang.
Ha kawei pat ka liang u la ong ruh ba na ka party ka dang bteng pyrshah ïa ka 12A kaba ki sngewthuh ba ka long kaba eh ruh ïa ka sorkar jylla ban law ïa kane.
