Nongstoiñ, Nailar 27: Ka Hynñiewtrep Youths Council HYC Maweit Circle mynta ka sngi ka la ïoh ban leit ïakynduh khnang ïa u Inspector Labour Nongstoiñ, ban dawa lypa ban nym ai labour license ïa ki dkhar kiba wan bylla ma Maweit Area.
Na ka liang HYC Maweit Circle ha ka jingïalam u samla Shemphang Tyrsa President, ki la leit ban ïakynduh bad kyrpad ban nym ai NOC ïa ki dkhar ne ki bar jylla kiba kwah ban wan trei hapoh area Maweit.
Katkum ka jinglap jong ka seng lyngba ka Sier Lapalang Operation, ki la don shibun ki dkhar kiba wan trei beaiñ hapoh area, khamtam ha kine ki sngi la sdang ban pyntrei ïa ki coke factory hapoh Maweit area.
Kumta, na ka liang ka seng ka kyntu jur ïa ka office ban nym ai NOC, namar kim kwah ba ka area Maweit kan long kum ka area Shallang ba ki bar jylla kin wan knieh ïa ka hok bylla ki para thaiñ. Ka seng ruh kan buddien ïa kane ban ym ai lad ba ki bar jylla kin wan knieh ïa ka hok jong ka thaiñ.
