Shillong, Nailar 27 : Watla kiwei ki party kim pat kren shai haba ïadei bad ka ishu kylliang shuki Myntri hapdeng ki MLA kiba don ha ka sorkar syrnop jong ka sorkar MDA hynrei na ka liang ka HSPDP ka la ong ba ki dep ïa shai halor kane ka bynta bad ki ap sa tang ïa ka por ban shim ïa ka rai.
Lah ban kdew hangne ba ka HSPDP ka don arngut ki MLA ba kynthup ïa u MLA ka Mawthadraishan Bah Shakliar Warjri ba bat ruh kum u Myntri ka tnad Sports bad uwei pat dei u MLA ka Mawshynrut Bah Methodius Dkhar.
Ha ka jingïakren bad ki lad pathai khubor, u President Rangbah ka party, Bah KP Pangniang u la ong ba haduh mynta hi ki kam ki la shai hapoh ka party hynrei ki ap sa tang ka por kaba biang ban shim ïa ka rai.
“Ïa kane na ka party ngi ap ïa ka por ynda u Myntri Rangbah u la pynbeit ïa ka bad ha kata ka por ngin sa ïa kren bad ia pynbeit,” u ong haba kren bad ki lad pathai khubor.
Shuh shuh haba jubab halor ka jingkylli la kan don neem ka jingkylliang shuki Myntri hapdeng ki MLA jong ka party, na ka liang u President u la ong, “Ïa kane ngim donkam shuh ban dang ïathuh ïaphi namar kumba phi la tip hi mynshwa ba kan don ka jingïasam lang ïa ka shuki Myntri. Tangba lano ngin ïa sam tang kata kaba sah ba ngin ïa kren.”
Ha kajuh ka por u President u ong ruh ba mynta ki dang ap ia u Myntri Rangbah na ka bynta ban pynbeit na ka bynta ka party jong ki bad kumjuh ruh na ka bynta kiwei ki party kiba donlang ha ka sorkar synrop.
