Kwah u rangbah na EJH ban pynkamai biang ïa ki bos MTC na Umkiang sha Jowai

Shillong, Nailar 27 : Uwei u rangbah na East Jaintia Hills District u la kynduh ïa u Chairman jong ka Meghalaya Transport Corporation (MTC) ha kane ka sngi Balang ban kyntu ïa u ban pynim biang ïa jingkamai ki bos MTC hapdeng ka Jowai bad Umkiang na ka bynta ka jingmyntoi jong ki paidbah ba sah ha katei ka thain.
Haba kren bad ki lad pathai khubor, une u rangbah ba tip kyrteng kum u Bah Wanshwa Nongtdu u la ong, “Mynshwa ha ki khyndiat snem ba la dep ki bos state (MTC) ki long ka jingkyrkhu kaba khraw ïa ki paidbah ka thain ha ka leit ka wan bad ha ka kit ka bah khamtam haba ïadei bad ka jingpynkit ïa ki mar bapher bapher. Hynrei na kino ki daw la pynsangeh noh,” u la ong.
Kumta ha kane ka sngi u la ïathuh ba dalade hi u la kynduh ïa u Chairman ka MTC na ka bynta ban pynsngew ïa ka jingdonkam biang ban don ïa ki kali heh ban ïaid ha katei ka thaiñ kiban pynsuk ha ka leit ka wan, ha ka kit ka bah khamtam eh haba ïadei bad ki mar rep kiba long u budlum ba kongsan bha haka ïoh ka kot jong ki paidbah ha kitei ki jaka.
Shwa kane, u Bah Wanshwa u la ïathuh ba katei ka thain kynthup naduh Ratacherra, Umkiang, Sonapur ter ter kadei kaba seisoh bha khamtam ha ka jingpynmih ia u tympew, kwai bad kiwei ki mar rep ban leit die ha iew. Kumta ha ka por mynshwa ha ka por ba dang don ka bos MTC ki paidbah ki myntoi bha.
“Ym tang katta, kiba myntoi eh dei ki khynnah skul namar ki ïoh ban leit ban wan lyngba kine ki bos. Kumta bun bha ki khmih lynti ban ïoh biang ïa kine ki bor ban ïaid ha ka thain jongngi,” u la ong.
Halor kane, u la ïathuh ba na ka liang u Chairman ruh u la ai ka jingkyrmen halor katei ka jingkyrpad jong u na ka bynta ban pynsuk ïa ki paidbah.
Shuh shuh u ong ba ka kam kaba sah mynta ka long ban buddien ïa kine ki kam na ka sorkar ba kan urlong ym dei eh tang ban shu kynnoh ïa ka sorkar ba kam leh ei ei.