Shillong, Nailar 26: Haba kren shaphang ki jingsngewkhia halor ka jingdon ki lehnoh ha ka jylla, u Myntri Rangbah u Conrad K Sangma u la ong ba katkum ki jingïoh jingtip lyngba lad syntiat la ïathuh ba ki don bun ki kam kiba dang ïaid, hynrei ka long kaba dangkloi palat ban pynkut ba ka don ka jingthmu ban ïathaw seng lehnoh biang.
Katkum ka jingong u Sangma, ka jinglong jingman ha shilynter u pud u sam bad ka Bangladesh ka la kylla bha ha kine ki snem ba la leit, kaba lam sha ka jingdonkam ban bteng ka jingpeitngor.
Haba kren sha ki lad pathai khubor ha ka sngi baar, u Sangma u la ong ba ka sorkar jylla ka la ïohpdiang bun ki jingtip lyngba ki lad syntiat manla ka sngi, kiba donkam ban pynshisha ha shwa ban shim ïa ki jingpynkut.
Katto katne ki kynhun kiba la treikam bha ha ki por mynshwa ki la ïasynriem bad ki kam runar ban ïa ki seng lehnoh.
“Ngi hap ban sngewthuh bad kynmaw ba ka jinglong jingman ha shilynter u pud u sam bad ka ri Bangladesh kam long shuh kajuh kumba ka la long ha ki snem ba la leit. Kumta ka long kaba shai ba ka lah ban don ka jingnoh sha kane ka liang bad ngam da kwah than ban pynpaw ïa ki jingtip ba bniah naba kadei ka kam ka jingshngaiñ jong ka ri, kumta ngam lah ban kren palat ïa ki jnit ki jnat, hynrei kaei kaba nga lah ban ong ka long ba ki don ki kam bapher kiba mih ha shilynter u pud u sam kiba la pynkylla ïa baroh ki jinglong jingman,” u la ong.
“Mynta ban ong ba ka long 100% kaba la jia ba ka don ka jingthmu ban thaw seng lehnoh biang, nga ong em, ngim lah ban pynkut ïa kata, ha ka jingshisha kam don hynrei ngi ïoh ki lad jingtip shaphang kane ka jingjia. Manla ka por ba ngi ïoh ki lad jingtip ngi pyrshang ban wad kaei kaba jia bad ban wad la ki don ki kynhun bad kiba bun ki dei ki kam jong ki dacoit, bad kine ki lynnong ki la khang noh mynta. Kumta kine ki jaitkam ki wan sha ngi hangne hangtai, bad ki jingïoh jingtip lyngba ki lad syntiat ki ïai wan sha ngi hynrei lyngba ki jingtip ngi pynkut ba lada ki ong ba ka don ka jingthmu ban thaw seng biang, kam long kaba dei,” ïathuh u Myntri Rangbah.
U Sangma u la pynthikna ba ka sorkar kan ïaibteng ban khmih bniah ïa ka jinglong jingman bad ban shim ki kam kiba kongsan ban pynthikna ba kan don ka shongsuk shongshngaiñ ha ka jylla.
Haba phai sha ka jingkren jong ka DGP u Myntri Rangbah u la ong, “Nga tharai ka DG ka pyrshang ban ong thik ïa kaei kaba la ka ïoh jingtip lyngba ki lad syntiat halor kane ka kam bad nga tharai ki lad pathai khubor ha kato ka por ki shim tang ïa ka bynta kaba nyngkong bad ki khlem kren ha ka dur ka dar jong baroh kawei. Kumta nga ai shaphi ïa ka dur ka dar baroh kawei, naba ngi ïoh ki jingtip lyngba ki lad syntiat manla ka sngi. Kine ki jingtip ngi hap ban pynshisha, ngim lah ban pynkut bad ong ba ka don ka jingthmu ban thaw seng, bad ki don ruh ki jingïoh jingtip kiba wan sha sngi manla ka sngi.”
“Mynta ka jinglong jingman ka la long kaba kham ma bad kham tieng na ka daw ka jinglong jingman ha ri Bangladesh bad namar kata kito ki jinglong jingman ki pynlong ïa ngi ban ïaibteng ban khmih bniah bad peitngor mynta,” u la bynrap.
