Shillong, Nailar 26 : Ka kynhun ïalehkai jong ka Mawkriah West SC ka la ïoh ban rung sha ka final jong ka SSA 3rd Division hadien ba a la ïoh ban pynliem noh ïa ka Madan S&CC ha ka semi final kaba long ha kane ka sngi Ba-ar ha madan SSA, Polo Shillong.
Haba phai sha ka jingïakhun dei u Maxwell Marak uba la ïoh ban pynkhih jar nyngkong na ka bynta ka Madan SCC ha ka minit kaba 14 jong ka kylla step. Tangba kane ka shim por tang kumba katto katne minit ha shwa ba ka Mawkriah kan ïoh ban pynphai bad pynïakhaid ïa ka jingïalehkai lyngba u Sebius Kharkrang ha ka minit kaba 35.
Ka jingïakhun ka la nang itynnad shuh shuh bad dei tang ha ka minit kaba 64 ba ka Mawkriah ka la ïoh biang sa shi kol ban ïoh lamkhmat ïa ka jingïakhun da 2-1 kol. Hangne ruh na ka liang ka Madan kam shym SCC kam shym la ailad satia bad dei ha k aminit kaba 78 ba ka la ïoh ban thep ïa ka kol pynïakhaid kaba pynlong artad ïa ki bor pynïaid ban pynjlan ïa ka jingïakhun sha ka extra time.
Hadien ba ka jingïakhun ha pdeng madan ka la kut noh da ka jingïakhaid mar 2-2 kol ïa ka rai rem rai jop la rah noh sha ka jingïashut tie-breaker.
Ha kane ka kylla ka Mawkriah West SC ka la ïoh ban pynkhih jar saw tylli katba ka Madan S&CC pat ka la ïoh tang lai tylli kaba pynlong ïa ka Mawkriah West ban rah suk ïa ka jingjop da 4-3 kol.
Katkum ki prokram ïalehkai, ïa ka final jong kane ka lympung la buh ban pynlong ha ka 30tarik mynta u bnai ha ka por 2:45 baje janmiet ha kaba ka jingïaknieh ban rah ïa ka nam lahduh kan long hapdeng ka Mawkriah West bad ka Umlyngka SC.
