Jowai, Nailar 24: Ka West Jaiñtia District Sports Association (WJDSA) ha ka 23 tarik Nailar, 2025 jong ka sngi Saitjaiñ kala ïoh ban sdang ïa ka lympung ïalehkai phubol ha ki ar tylli ki kyrdan (Division) kata jong ka ‘8th Debo Shullai Memorial Trophy Second Division Football 2025 bad ka ‘5th Adelbert Memorial Trophy Third Division Football 2025’ bala pynlong ha madan Kiang Nangbah Stadium Dongmihsngi, Jowai.
Haba phai sha ka jingïakhun ba nyngkong haka kyrdan 3rd Division ka Loomiongkjam SC kala jop da 2-0 kol ïa ka Chyrmang Wah. Ïa ki kol na ka Loomiongkjam SC la thep da u Kamwamut Bamon haka minit ba 4 bad u Embhahlang War haka minit ba 35.
Ha ka jingïakhun kaba ar ka Weat Madan Mustem kala jop da 2-1 kol ïaka Mookaswan Dongneiñ, ïa ki kol na ka West Madan Mustem la thep da u Beloved Talang haka minit ba 3 bad u Nineciful Shylla haka minit ba 60. Ïa ka shikol na ka Mookaswan Dongneiñ la thep da u Lastborn Phawa haka minit ba 35+1.
Katba haka 2nd Division ka kynhun jong ka Lumbhahdakha Wahiajer kala jop da 3-2 kol ïa ka Luti Tuber Social Welfare, ïaki kol na ka Lumbhahdakha Wahiajer la thep da u Kamjuhhi Phawa haka minit ba 3 & 64 bad u Balajied Shylla haka minit ba 27. Ïa ki kol na ka Luti Tuber Social Welfare la thep da u Daphi Dhar haka minit ba 40+1 bad u Chalinstar Lyngdoh haka minit ba 53.
Baroh ki kynhun kiba wan ban ïashim bynta ha ka ‘8th Debo Shullai Memorial Trophy 2nd Division Football 2025 ki don 19 tylli. Katba ha ka ‘5th Adelbert Memorial Trophy 3rd Division Football 2025 ki don 30 tylli. Ka jingïakhun ka bteng biang haka sngi nyngkong jong ka 25 tarik u Nailar 2025.
