SSA 2nd Division 2025: ïakhaid ka Smit bad ka Nongmensong

Shillong, Nailar 24: Ka Nongmensong SC bad ka Smit SC ki la ïasam mar shi point hadien ba ïakhaid da mar 1-1 kol ha ka jingïakhun ïa ka lympung Second Division Football League 2025 jong ka Shillong Sports Association, kaba la long ha ka sngi Saitjaiñ ha madan First Ground-SSA Stadium, Polo.
Haba phai sha ka jingïalehkai, ka Smit ka la ïoh ban pynkhihjar tang hadien 9 minit ba la ïaid ka por lyngba ka kol ba la thep da u Apburom Nongrum ban lamkhmat ïa ka kylla step. Hynrei u Shemphang Myrthong (77′) u la pynïakhaid na ka bynta ka Nongmensong ha ka kylla miet.
Kadei ka jingïalehkai kaba nyngkong jong ka Smit mynta ka samoi, katba ka Nongmensong kadei ka jingïalehkai kaba ar. Ka jingïalehkai kaba nyngkong ruh jong ka Nongmensong ka la kut ha ka jingïakhaid da 1-1, pyrshah ïa ka Marbisu.
Ka prokram ïalehkai ha kane ka sngi Nyngkong kan sdang ha ka por 11:15 baje mynstep ha kaba ka Lumshyiap kan ïakhun pyrshah ïa ka Mawpat.
Hadien kane kan don ka semifinal jong ka SSA Third Division hapdeng ka Umlyngka SC bad ka Umryngjah SC, ha ka por 2:45 baje nohphai sngi.