Palat hajar ngut ki samla ba pass bha pynkup burom ka NPYF, 164 tang na East Khasi Hills

Shillong, Nailar 23 : Ka National People’s Youth Front ha ka sngi Saitjaiñ ka la pynkup burom haduh palat 164 ngut ki samla jong ka East Khasi Hills District kiba pass bha ha ka eksam klas 10 bad klas 12 kaba dang shu pynbna shen.
Kumba long haduh mynta, ki la don palat hajar ngut ki samla pule na kylleng ki distrik jong ka jylla kiba la dep ban pynlong ïa ka jingpynkup burom ha kine ki bnai bad ki taiew ba la dep.
Ha kane ka jingpynkup burom kaba dei tang na ka bynta ka East Khasi Hills District la wan ban donlang da President ka NPP East Khasi Hills Bah Gavin Mylliem ba dei ruh u MLA ka Sohra, nangta u President ka State President jong ka National People’s Youth Front (NPYF) Bah Wailad Shylla ba dei ruh u MLA ka jowai, ka President ka National People’s Women’s Front Kong Grace Kharpuri ba dei ruh MDC ka Nongshken bad ruh u MDC ka Mawsynram Bah Alvin Sawkmie.
Kiwei pat kiba donlang ki kynthup u naduh u General Secretary ka party u Prof Don War, Working President ka NPYF Bah Bajop Pyngrope, President ka East Khasi Hills NPWF Kong Damelari Ryntathiang, State Secretary ka NPYF Bah Ethan Kharpuri, kynthup naduh u General Secretary ka NPYF Bah Phermanbha War, u MLA barim Bah Kennedy Khyriem, Bah Jied Kurbah nalor ki nongïalam jong ka NPYF East Khasi Hills hapoh ka jingïalam jong u Bah Khraw Sohkhlet kum u President nalor kiba bun ki nongïalam ka NPP, NPYF bad NPWF.
Haba phai sha ka jingdon ki samla kiba pass bha, na ka thup ki klas 10 ki la don haduh 119 ngut kiba la ïoh palat 80 persen shaneng katba ha ka klas 12 pat ki la don 46 ngut.
La pynshongkun ïa kane ka prokram da ka jingdonlang ki kmie ki kpa bad ki bahaiing ha sem kiba wan ban synran ïa ki khun ki kti.
Na ka liang u Bah Gavin haba kren kum u Kongsan u la ong ba katei ka jingpynkup burom ïa ki samla kadei tang ka dak ka jingithuh ïa ka jinglah jong ki ban trei shitom bad minot ha ka eksam. U ong ruh ba kane ka long ruh kum ka jingkitbok ïa ki ba kin lah ban jam shakhmat ha ka jingpule ba kin poi sha ka thong.
Katba, u Bah Wailad pat u la ong ba kum ka party ki sngewkmen lang haba ki khun samla ki kiew ha ka jingpule khamtam ha kum kane ka juk ba ka jingïakhun ban tam shakhmat ka jur bha.
U ong ruh ba nangne shakhmat ki khun samla ki donkam ban don ïa ka thong kaba skhem ban ïakhun ha ka jingim ym dei eh tang ban buh thong ha ka kam sorkar hynrei ha kiwei ruh ki jait kam kiba bun kiba ki lah ban ieng ha la ki jong ki kjat.