Shillong, Nailar 22: U Myntri Khynnah ka Sorkar Pdeng uba khmih ïa ka Tnat ki Kam Pohïing u Bandi Sanjay Kumar ha ka sngi Thohdieng u la wanjngoh ïa ka Shillong bad u la shong bishar kam ïa kiba bun ki skhim ba la pyntreikam da ka sorkar jylla.
Ha kane ka jingwan jngoh jong u, u Kumar u la ïasyllok bad ki tnat bapher bapher, ban pan ïa ki jingai jingmut bad ban pyni ruh ïa ki kam ba dangsah kiba donkam ki jingpynleit jingmut na ka sorkar pdeng.
“U Myntri Khynnah ka sorkar pdeng u la pynthikna ba u la long uba kloi ban ïakren bad kino kino ki kam kiba dangsah bad ka sorkar pdeng,” ong u Additional Chief Secretary Shakhil P Ahammed sha ki lad pathai khubor hadien ka jingïalang.
Haba kylli la ka don ne em ka jingïakren kyrpang halor ka khappud ka India Bangladesh ha ka jingïalang, u Ahammed u la ong ba u Myntri Khynnah ka Sorkar pdeng u la kren beit tang ïa ki kam kiba ïadei bad ka tnat home bad ïasyllok tang ïa ki kam kiba dangsah.
U Kumar ha kane ka jingwan jong u, u la shong bishar kam ïa baroh ki skhim ka sorkar pdeng bad ai jingmut ruh kumno ban pynbha bad ban pyntreikam ïa ki.
