Jowai, Nailar, 22: Ka Jaiñtia Students’ Union (JSU) Seng Kmie mynta ka sngi ha ka jingïalam u Neilkee Mukhim General Secretary bad u Vice President u Ryngkatshanbor Diengdoh, ki la leit ban kynduh ïa u Deputy Commissioner ka West Jaiñtia uba dei ruh u Chairman jong ka District Selection Committee (DSC) ka West Jaiñtia Hills, halor ka jingïadei bad ki tarik Written Exam jong ka DSC kiba ïatyngkhuh bad ka Exam jong ka MPSC.
Kane ka dei ka sien ba ar ba ka seng ka la leit ban ïakren bad u DC kum u Chairman ka DSC bad mynta hi ka sngi ka seng ka la ïoh jubab ba hadien ba la bishar bniah ym lah shuh ban pynkynriah ïa kine ki tarik ba la buh, kum u Chairman ula dep ban pyntip ïa kane sha ka MPSC hynrei kam shim la shimkhia ban pynbeit ïa ki tarik exam khamtam ha ka jingïadei bad ka Post Junior Co-operative Officer ka ban long ha ka 6/9/2025 bad ha kane ka juh hi ka sngi ka DSC ruh ka don ka written exam jong ka Gram Sevak Supervisor.
Halor kane ka JSU ka pynpaw ka jingsngewkhia kaba jur halor ka jingïatyngkhuh tarik namar kane ka lah ban pynduh nong ïa ki nongïakhun exam, pynkut ka kyrwoh ba la phah da ka seng.
