Shillong, Nailar 22: Ka kynhun ki thei ïalehkai phutbol ka Meghalaya ka la bteng ïa ka jingjop ba paka jong ka da kaba pynliem kput ïa ka Dadra and Nagar Haveli and Daman and Diu (DNHDD) haduh 12-0 kol ha ka jingïakhun kaba lai bad kaba khatduh na ka Pool D jong ka Subroto Cup 2025’s U-17 Girls’ ha New Delhi hynnin ka step jong ka sngi Thohdieng.
Ka Daphi Syngkli ka la long ka namtam ha kane ka jingïalehkai, ha kaba ka la thep marwei haduh 7 kol ban pynthikna ïa ka jingjop kaba lai sien lynter ïa ka kynhun. Kane ka jingjop ka mut ba ka Meghalaya ka la rung sha ka wat ïakhun QuarterFinal jong kane ka lympung.
Kiwei pat kiba la pynkhihjar ha kane ka jingïalehkai ki long ka Jasmine Syngkli bad ka Rimika Khongkai kiba la pynkhih mar ar kol, nangta ka Ibamihpli Kharpan ka la ïoh ban thep kawei.
Mynta u snem ïa ka Meghalaya la mihkhmat da ka Nongjri Presbyterian Secondary School kaba na Ri-Bhoi ha katei ka lympung.
Shuwa kane ka kynhun ki thei ïalehkai ka Meghalaya ki la sdang ïa ka jingïalehkai ha ka sngi Balang da kaba jop 5-0 kol pyrshah ïa ka International Sports Schools Organisation bad nangta da 3-0 kol ïa ka Chandigarh ha ka sngi Palei.
Lah ban kdew ba ka Subroto Cup ka dang bteng ban wanrah ïa ki jingialehkai phutbol kaba itynnad man la ka sngi, kaba ai ïa ka rynsan na ka bynta ki samla kynthei na kylleng ka ri India bad shabar ban tyngshaiñ. Kane ka lympung ym tang ba ka wanrah tang ïa ki jingïalehkai kiba itynnad hynrei ka don ruh ka bynta kaba kongsan ha kaba pynroi ïa ki sap ïalehkai phutbol ha ka lawei na ka bynta ka ri.
Tang ki kynhun ba wan ha khlieh duh na kawei pa kawei ka pool kin ïoh rung sha ka Quarterfinal, kaba baroh kin long ha ka step jong ka Sngi U Blei. Ka jingïakhun jong ka Meghalaya kan long pyrshah ïa ka kynhun ba jop ha ka Pool C (ban sa pynthikna) ha ka por 9:30 baje mynstep ha Ambedkar Stadium.
