Jowai, Nailar 22: Ka jingïalehkai phainal jong ka ‘Independence Day Cup Football Tournament 2025’, bala pynïaid daka Amlarem Sub-divisional Sports Association (ASSA) ha ryngkat ka jingïatreilang bad ka ophis SDO (Civil) Amlarem Sub-Division ha madan phutbol Jaraiñ, Amlarem Sub-Divisional kala long kaba ïaid beit ïaid ryntih.
Haka kyrwoh khubor ba la phah khamslem la ong ha ka jingïakhun phainal jong ka kyrdan Under-13 (Boys) ka Amtasam kala jop da ka jingïashut Tie Breaker da 4-3 kol ïaka Traki Mawngap. Ha kane ka kyrdan ïa ka Man of the match la ïoh da u Brillian Surong jong ka Traki Mawngap, Top Scorer la ïoh da u Comingson Pohshna na ka Traki Mawngap, Best Promising Player la ïoh da u Disuk Rasmut na ka Amtasam bad ïa ka nam Best Goal Keeper la ïoh da u Lutmon Hayong na ka Lamin XI.
Ha ka kyrdan Under-15 (Girls) ka kynhun ïalehkai jong ka Pdengshakap United kala jop da 1-0 kol ïa ka Jarain C&SC, ïa katei ka shikol na ka Pdengshakap United la thep da ka Gratify Dhar ha ka minit ba 22. Ha kane ka kyrdan ïa ka nam Man of the match la ïoh ban rah da ka Gratify Dhar na ka Pdengshakap United.
Katba ha ka kyrdan Under-15 (Boys) ka kynhun ïalehkai jong ka Amkoi SC kala jop da 2-0 kol ïa ka Pdengkarong SC, ïa kitei ki ar kol na ka Amkoi SC la thep da u Sakhiues Lamin ha ka minit ba 23 bad u Coperfiel Pohlong haka minit ba 43.
Ha kane ka kyrdan ïa ka nam Best Goal keeper la ïoh da u Stephan Pyrtuh na ka Jarain CSC, Best Promising Player la ïoh da u Forland Syndai na ka Syndai SC bad ka nam Top Scorer la ïoh da u Emmon Mylliem na ka War Jaiñtia Veteran Youth Team.
