Shillong, Nailar 21 : Ka Head of Department jong ka Khasi ha Skulbah NEHU, Prof Streamlet Dkhar ha ka 15tarik mynta u bnai ka la pyllait paidbah ïa ka thup poitri “Na Tyngier Ba Sop Pring” ïa kaba la thoh da i samla Civilin Khongtiang kaba dei ruh ka jingthoh ba nyngkong jong i ha ka thoh ka tar Khasi.
Ha kane ka jingïalang kaba pynlong ha iingsah jong i Dr. David Tariang ïa ka jingïalang la pynïaid da i Dr. David ha ka jingïadon lang iTBn Dr. B.Ps Toi iba long ruh uwei na ki nongthoh kot ha kane ka jylla lem ruh ki kmie kpa bad ki bahaiing hasem jong ine i samla kumjuh ki bahaiing ha sem jong u Dr. David bad Kong Bala.
Na ka liang u Dr. David ha ka jingkren pdiang u la pynkynmaw ïa ka poitri u Babu Soso Tham ka ba ong, “Baroh u briew ba stad; mano ba lah ban len; la khlem da plie ka lad; kumno un lait ban kren”.
Ka myllung ruh ka la hap ban ïaid ïa ka lynti kaba eh ban poi sha kane ka thong, bad ka la pynpaw ïa ka jingsngewnguh jong ka ïa U Blei ba U la ai ïa ka ia kane ka sap ban thoh. Ka la ñiew ia kane ka sngi ba ka long ka sngi kaba kyrpang ha ka jingim jong ka. Ka la pynpaw ruh ka jingsngewnguh ïa ki kmie ki kpa kiba la ai ia ka ia ka longrynieng bad ka longbriew manbriew.
Kum ka samla ba wan na nongkyndong kaba im ha pneh ka mei mariang, ha sawdong i lyngwiar dpei, hapdeng i tyngier ba sop pring, ka la ïohi ia ka jingkylla jong kane ka juk ha kaba ki briew ki beh sha kaba thymmai bad ki sdang ban pynduh jait ïa ki matti u mynbarim. Kumta da ka jingkitkhlieh ban pynnneh ïa ki matti u longshuwa ka la wanrah ïa ki jingsop ka kot ïa i tyngier ba sop pring ban pynkynmaw ïa ka iing u Khasi.
Ka la batai ïa ka jingmut “ Na Tyngier ba sop pring ” dakaba ong, “Ha ka jingim jong ngi ki briew ngi long thik kum ka tyngier ba sop pring ha kaba ngi hap ban mad shibun ki jingeh ha ka jingïaid lynti ka jingim. Hynrei ha shuwa ban ngin poi sha kliar ka nam bad burom ngin hap ban sop pring”.
Ka Prof. Streamlet Dkhar kaba long ka kongsan ka la ai mynsyiem ïa kane ka samla kaba la thoh haduh sawphew tylli ki poitri ha ki rukom bapher bapher. Haba bishar kyllum kane ka myllung ka la thoh ha ka dur jong ka lyrik poitri.
Haba ka pule ia ki jingthoh, ka la iaroh ïa jingpynpaw jong ka ia ka poitri ba ar, “Ka dor jong ka kynthei” ha kaba ka la ïaroh ïa ka jingkordor ka kynthei kum ki mawkordor. Nangta ka ong shuh shuh kane ka myllung ka ih ha ka jingmut jingpyrkhat ba ka la wan rah ïa ki poim Shongkha khynnah, u Lurmangkara bad Panshandi bad kiwei kiwei de, kiba pynphalang ia la ka jaitbynriew. Na ka liang ka Prof. Streamlet ka kitbok ïa kane ka samla ba kan san, kan mer ha ka thoh ka tar ha ki por ki ban wan. La pynwai ïa ka jingïalang da ka jin gduwai na iTbn. Dr. B.Ps Toi.
