U Syiem bad ka Hima ki dei ban khot da ka jingïalang paidbah lada ki thmu ai jaka sha ki BSF

Mawkyrwat, ‘Nailar 21: Ka Hynñiewtrep Youth Council (HYC) jong ka South West Khasi Hills District hapoh ka jingïalam u President ka District u samla Pynskhem kharjahrin ryngkat ka HYC Ranikor Circle ha ka 19 tarik mynta u bnai ka la ïa kynduh ïa u Syiem ka Hima Maharam ban ïakren halor ka mat ba lah shim da kawei na ki sengbhalang hapoh South West Khasi Hills District, kata ka KSU ha kaba ïa dei bad ka jingthmu u Syiem lem bad ka hima ban die bad ai ïa ka jaka kaba long 70 acre sha ki Shipai BSF.
Namarkata, u samla Pynskhem kharjahrin kum u nongïalam ka Hynñiewtrep Youth Council (HYC) jong ka South West Khasi Hills District, hadien kane ka jingïakynduh bad u Syiem u la ong ba na ka liang ka Hynñiewtrep Youth Council (HYC) jong ka South West Khasi Hills District baroh kawei ryngkat bad ka Hynñiewtrep Youth Council (HYC)Ranikor Circle ki ai ka jingkyrshan ba pura halor kane ka mat ba la shim da ka KSU.
Shuh shuh u samla Pynskhem ula ong ba ka seng hi ka ïeng ha ka nongrim ban pyrshah ïa kane ka jingthmu ka hima ban ai lane die ïa kane ka jaka sha ki shipai BSF kaba long haduh 70 acre bad lada u syiem bad ka hima ki mut ban ai lane die ïa kane ka jaka sha ki shipai BSF ki hap ban khot da ka public hearing ne jingïalang paidbah khnang ban tip la ki khun ki hajar ka hima ki kyrshan ne kim kyrshan kumba ki sengbhalang kim kyrshan ïa kane ka bynta.