Shillong, Nailar 21 : Ka Chairperson jong ka Meghalaya State Commission for Protection of Child Rights (MSCPCR) Agatha K Sangma ka la thoh sha u Myntri Rangbah ka Jylla Conrad K Sangma ban kyntu ïa u ban pyntrei da kano kano ka rukom treikam kaban peit lang ïa ka bha ka miat jong ki ksew surok ha ka jylla.
Ha ka shithi, ka Chairperson ka la pynpaw ïa ka jingsngewkmen halor ka jingpyrshang jong u Myntri Rangbah ban peit lang ïa ki ksew surok bad kumta ka kyrpad ruh ïa u ban tuklar lang halor katei ka mat kaba ka tyrwa.
Na ka liang ka Commission ha ka shithi, ka la kdew ruh ïa ka jingdonkam ban don ki jaka bam, ki jaka ban ai jingpynshai, ki jaka ban pynkhuid ïa ki ksew bad ruh halor ka jingai tika ban pyntikna ia ka koit ka khiah jong ki ksew surok.
Shuh shuh ka la kdew ruh ïa ka thong treikam jong ka sorkar pdeng kaba ïadei bad ki ksew surok lyngba ka Animal Birth Control (ABC) program bad Prevention of Cruelty to Animals Act, 1960.
“Ngi kyrmen skhem ba ka Meghalaya kan long ka model state kaba pdiang bad pyntreikam ïa kane,” ka la ong.
Nangta ka ong ruh ba ki kyntu ia u Myntri Rangbah ka Jylla ban shim ïa ki sienjam kiba khlain ban pyntreikam ïa kine ki mat na ka bynta ki ksew surok khnang ba kin ïoh lang ïa ka jingsumar ha ka jylla.
