Nongstoiñ, Nailar 21: Ka jingtei ïa ka shlem ai jinghikai lane Polytechnic ha Mawrusyiar West Khasi Hills naduh ki snem ba mynshuwa na ka bynta ba ki samla pule kin leit ban pyntbit ha ki bun jait ki kam ka dang sah khongreng haduh kine ki sngi.
U nongthoh khubor ha ka jingleit jurip ha ka sngi palei ka 21 tarik u Nailar, la lap ba ka la kylla long pynban kum ka jaka rieh jong ki riew sniew, namar ba baroh sawdong la tap da ki sañium bad la ka la long kum ka khlaw bniap.
Nalor kata la lap ba kawei pat ka building kaba don kham shajrong, ki don ki nongtrei kiba dang shu sdang ban wiring ïa ki kamra. Hynrei baroh ki kamra kim don jingkhang satia naduh ka jingkhang kaba nyngkong ka ban rung shapoh ruh.
Kum ban pynkynmaw ba ha ki snem ba la dep ki heh sorkar ki la wan ban jurip ïa katei ka jaka pule, hynrei katei ka jingwan jurip jong ki kam shym la sei soh satia.
Kumta ka jingbym lah ban pyndep ïa katei ka jaka ai jinghikai ïa ki samla napoh ka West Khasi Hills, kiba kwah ban pyntbit ha ki jingpule bapher bapher, ka la long pynban kum u mawsiang ba wit ïa kito kiba wan na ki longïing kiba duk kiba kyrduh ki bym don lad ban leit pule sha Shillong, watla ki don ki samla kiba thrang ban pule pyntbit ha ki jingpule bapher bapher.
Na ka liang ki seng bhalang kiba treikam hapoh ka district na ka por sha ka por, ki la pynsngew bad kyntu ïa ka sorkar ba kan pynbiang noh ïa baroh ki jingdonkam, khnang ba ki samla kin ïoh lad ban leit pule hynrei ka sorkar kam patiaw satia haduh mynta.
Kiba bun ki kynnoh ba ka dei ka jingbym kheiñ snep jong ka sorkar ïa ki paitbah jong ka West Khasi Hills, namar ym tang katei ka jaka pule kaba don ha katei ka jaka kaba sah kut.
Hynrei, la jan man ki kam kiba long ki jingmyntoi na ka bynta ki paitbah ki sah kut lut, nuksa kum ka Industrial Training Institute kaba don ha ka shnong Sohpian ha syndah jong ka Headquarter jong ka 4th Meghalaya Police Battalion kaba la dep ban pynbit pynbiang la slem hynrei haduh mynta ym pat plie satia.
