Shillong, Nailar 21: Ka Meghalaya Sport Climbing & Mountaineering Association ka la ïoh ban sdang ïa ka State Level Awareness Program halor ka Sport Climbing & Adventure Activities 2025 ha ka sngi Thohdieng ha Eastern Command Sport Climbing Node, 58 Gorkha Training Centre (GTC), Happy Valley.
Ha ka jingïalang plie pyrda la wan Kongsan da u D.D. Shira, MCS, Director ka tnad ïalehkai jong ka Sorkar Jylla, ha ka jingïadon lang u Brig. U Joe Sabby, Commandant, 58 GTC kum u symbud Kongsan, nangta u Bah Finely Pariat-General Secretary ka Meghalaya State Olympic Association, kum u Kongsan ba kyrpang.
ïa kane ka prokram ban pynsngewthuh halor ka Sport Climbing & Adventure Activities la pynlong da ka Meghalaya Sport Climbing & Mountaineering Association ha ka jingïatreilang bad ka Eastern Command Sport Climbing Node, 58 GTC ryngkat ka jingkyrshan na ka tnad ïalehkai jong ka Sorkar jylla Meghalaya. Kane ka prokram kan ïaid ar sngi naduh ka 21 haduh 22 tarik Nailar, 2025.
Kane ka prokram ka pyni ïa ka sienjam kaba kongsan ha ka jingpyrshang ban kyntiew ïa ka Sport Climbing bad kumjuh ruh ïa ka Adventure Sports ha kylleng ka jylla.
Ka sienjam kaba kongsan ka long ka jingpynbna ïa ka kynroh lane ka climbing wall kaba dang shu shna thymmai ha ka Centre—ba la shna nkyrpang na ka bynta baroh lai tylli ki jait jingïalehkai kiew lum jong ka pyrthei: ba kynthup ïa ka Bouldering, Lead, bad ka Speed Climbing.
La khmih lynti ba kane ka jingtei kaba thymmai (Climbing Wall) kan pynroi ïa ka jingsngewthuh, kan pynshlur ïa ka jingïashim bynta, bad pynshlur ïa ki khynnah samla ban pdiang ïa kam kiew lum kum ka jingïalehkai kaba ki hap ban ïakhun bad ka jingpyrshang ban pynsngewtynnad.
Kane ka prokram ka la khring haduh 96 ngut ki nongïashim bynta na ki 10 tylli ki District jong ka jylla Meghalaya, kiba kynthup na Garo Hills, Jaintia Hills, Ri-Bhoi, West Khasi Hills, bad East Khasi Hills. Ki khynnah skul jong ka Army Public School, Happy Valley ruh ki la wan ïashim bynta lang ha kane ka prokram, da kaba sakhi ïa ka jingpyni kiew lum kaba pynkhihwin da ka kynhun jong ka Eastern Command.
Ha kane ka sngi, ka Association ka la pynpaw ïa ka jingsngewnguh kaba khraw ïa u Commandant jong ka 58 Gorkha Training Centre na ka bynta ka jingkyrshan ba sngur mynsiem jong u ban ailad bad pynïoh ïa ka synjuk ïa ki jingdonkam, kaba la pynlong ïa kane ka jingthmu kaba ïaid beit bad kaba seisoh.
