Shillong, Nailar 21: Ka kynhun ki thei ïalehkai phutbol jong ka jylla Meghalaya ba la mihkhmat da ka Nongjri Presbyterian Secondary School (Ri-Bhoi), ka la bteng ïa ka jingïalehkai ba paka jong ka ban jop ar sien lynter ha ka kyrdan Junior Girls (U-17) jong ka lympung Subroto Cup International Football Tournament 2025 ha New Delhi.
Ha ka jingïalehkai kaba ar jong ka Meghalaya ha ka Pool-D, la sakhi ba ka la pynliem noh ïa ka Chandigarh da 3-0 ban bteng ïa ka jingjop kaba ar sien lynter ha kane ka lympung. Kine ki lai tylli ki kol la thep mar kawei da ka Jasmine Syngkli, Rimika Khongkai bad ka Baiaiteilut Mangu.
Haba phaidien, ki thei ïalehkai ka Meghalaya ki la sdang ïa ka jingïakhun jong ki na ka Pool D da kaba jop suk haduh 5-0 kol ïa ka International Sports Schools Organisation.
Tang ki kynhun ba wan ha khlieh duh na kawei pa kawei ka pool kin ïoh ban rung sha ka Quarterfinal, kumta kane ka jingjop ka la nang ai jingkyrmen shuh shuh ïa ka jylla ban bteng ïa ka lynti ïaid sha ka wat ïakhun quarter final.
Ka Meghalaya kan aireng pyrshah sa ïa ka Dadra and Nagar Haveli and Daman and Diu (DNHDD) ha ka jingïalehkai ba khatduh jong ki na ka pool D ha kane ka sngi Thohdieng ha ka por 6:15 baje mynstep.
