Mawryngkneng, Nailar 21: U Bah Isaiah Kharmawphlang u ba dei u President ka Wrestling Association of Meghalaya ha ka 16 tarik u Nailar 2025 u la ïoh ban wan pynskhem ïa ka Mawryngkneng Block Wrestling Association (MBWA) bad ka jingpynskhem jong ki nongkit kam jong kane ka seng.
Ha ka jingialang kaba la long ha kane ka sngi, la ïoh ban jied President ïa i bah Wellanstar Warlarpih, General Secretary bah Kesmanful Nongpluh, Vice President bah Wallam Mynsong bad bah Bonelson Mynsong, Joint Secretary bah Bapyntngen Nongpluh, Assistant Secretary bah Kyrmen Nongpluh bad Treasurer Bah Ïainehlang Nongrum.
Haba ai jingkren ha kane ka sngi u bah Isaiah, u la pynpaw ba kane ka dei ka jingkmen shibun eh na ka bynta jong ka State namar ba kane ka dei ka sien kaba nongkong ba la ïoh ïa ka Mawryngkneng Block Wrestling Association. U la ong ruh ba kane Mawryngkneng Block Wrestling Association kan long ka nonglam lynti na ka bynta baroh ki Block jong ka State ban bud ïa kane ka nuska khnang ban ïoh pyntrei kam ban pynsuhthied ïa kane ka Wrestling ha baroh ki kyntoit ha baroh ki shnong jong ka jylla.
U la ai khublei shibun eh ïa ka jinglah ban seng ïa kane ka Association jong ka Wrestling bad kaba la ngeit ba nangne shakmat kan ïoh ban sei ïa ki players kiba lah ban wanrah nam ïa ka jylla jong na baroh ki kyntoit jong kane ka Mawryngkneng Block u la bynrap.
Kane ka jingthmu ka long naka bynta ki nongshong shnong jong kane ka Block bad naduh mynta ki samla kynthei bad shynrang kiba don ka jingthmu bad ka jingangnud ban lehkai ha kane ka Wrestling kin sngewbha ban phone ha ki nongïalam. Ïa ka jingïalehkai shen yn sa ïoh ban sdang noh, ïa ki madan ïalehkai ki jaka ïalehkai la pynbiang nadong shadong.
