SHILLONG, Nailar 21: Ka PFR FA ka la ïoh ban khur ïa ka jingjop da kaba wanphai nadien ban pynliem ïa ka Tynring SC da 3-2 kol ha kawei na ki jingïalehkai jong ka lympung Second Division Football league 2025 ba la pynïaid da ka Shillong Sports Association ha madan First Ground-SSA Stadium, Polo hynne ka sngi Palei.
Ha kawei pat ka jingïalehkai jong kane ka sngi hapdeng ka Sohryngkham SC bad ka Umphrup SC ka la kut ha ka jingïakhaid, ha kaba baroh arliang ki la thep mar 1 kol.
Ka jingïalehkai kaba nyngkong, ka Tynring SC ka la ïoh ban lamkhmat ïa ka kylla step lyngba ki ar tylli ki kol ba la thep marwei da u Damonlang Sylliang (2’min & 24’min).
Hynrei ka jingïalehkai ka la kylla bak ly bak ha ka kylla miet ha kaba ka PFR ka la wanphai da kaba tyngeh ban thep syndon haduh lai kol lyngba u Adelbert Khongshun (55’min), u Peter Lamare (66’min) bad na u Thymmaibor Mukhim (74’min) ban knieh jyndat ïa ki lai point na ki kti jong ka Tynring.
Ha ka jingïalehkai kaba bud la ïohi ïa ka Umphrup SC kaba la lamkhmat nyngkong na ka kol jong u Winjesstar Nongbri (21’min) hynrei u Macheaveen Nongbri (28’min) na ka bynta ka Sohryngkham shuwa ban kut ka kylla step. Haduh kaba kut jong ka kylla miet ka kol ka sah kumjuh kaba pynlong ïa kine ki arliang ban ïasam mar shi point.
Ha kane ka sngi Thohdieng (22.08.2025) ki jingïalehkai jong ka SSA 2nd Division Football league 2025 kan sdang ha ka por 11:15 baje mynstep hapdeng ka Mawpat SC pyrshah ïa ka Umpling SC, nangta bud sa ka jingïakhun hapdeng ka Mawryngkneng SC pyrshah ïa ka Sohiong SC.
