Shillong, Nailar 20 : Ka sorkar jylla ha kane ka sngi Balang ka la pynbna ba kan pyndep noh ïa ka jingpynkynriah ïa ki nongdie madan na kylleng ki bynta jongka nongbah Shillong ha shwa ban kut u Naiwieng jong mynta u snem.
Haba kren bad ki lad pathai khubor, u Myntri ka tnad Tourism Bah Paul Lyngdoh u la pyntip ba ka sorkar mynta ka thmu ban pynkynriah ia ki nongdie madan na kylleng ki jaka la ka long naduh Laitumkhrah, na ka thain Civil Hospital, nangta na Them Bijoy ter ter shaduh Motphran. U la ïathuh ruh ba ïa kane ka jingpynkynriah yn sa leh da ka kylla ha kaba kin pyndep shi bynta bynta shwa.
“Kine ki dei ki jaka ba long pdeng bha bad ngi la buh ruh da ka thong ba ngin pyndep noh ban pynkynriah noh bad ban pynkylluid ïa kitei ki jaka ha shwa ban kut u Naiwieng mynta u snem,” u la bynrap biang.
U Myntri u la ïathuh ruh ba ka sorakr jylla ka la dep ban pynkynriah lut ïa ki nongdie madan ha Khyndailad da kaba pynlong ïa katei ka jaka kum kawei na ki jaka ïaid kjat kaba mynta baroh ki iaroh lut.
U ong ruh ba wat hapdeng bun ki jingeh ba ki kynduh hynrei ka projek ka la long kaba seisoh bad ka sorkar mynta ka la phaikhmat pat sha kiwei ki jaka ba long iew ban pyntyllun shakhmat ïa ka kam.
