SHILLONG, Nailar 20: Kum shi bynta ban pynkhreh bad jied ïa ka kynhun shuwa ka 39th National Games 2027 ka Meghalaya Rowing & Watersports Association (MRWA) kan pynlong ïa ka Talent Scout lane ka prokram ban wad ïa ki samla donsap ha ki jingïalehkai Water Sports, kaba la thmu ban pynlong ha Tura, Jowai, Nongstoin bad ha Shillong.
Kumta na ka liang jong ka MRWA ka khot sngewbha ïa ki nongshong shnong jong ka jylla Meghalaya kiba kwah ban ïashim bynta ha ka prokram Rowing Talent Identification ban jied ïa ki nongïalehkai kiba kynsai ban mihkhmat ïa ka Meghalaya.
Ki nongïashim bynta kiba lah ban wan sha kane ka prokram kidei kiba naduh 18 haduh 22 snem na ka bynta baroh shynrang bad kynthei. ïa ki kynthei ka jingjrong ki dei ban kynjoh 5 phut 5 inshi, katba na ka bynta ki khynnah shynrang ka jingjrong kadei ban kynjoh 5 phut 7 inshi.
Yn pdiang ruh ïa ki khynnah ïalehkai kiba trei shitom na kano kano ka jait jingïalehkai bad kiba la ïashim bynta lypa ha ka jingïakop bapher bapher. Bad ki dei ban lah ban jngi la kumno kumno 50 metar.
Ki khynnah samla kiba don jingthmu ban shim bynta ha kane ka prokram Talent Scout ki lah ban phah ïa ki biodata ha ka Email :meghalayarowingandwatersports@gmail.com, lane ha u WhatsApp nombar: 9089200614.
Kane ka Talent Scout kan sdang shuwa na Tura ha ka 26 tarik Nailar, Nongstoin ha ka 30 tarik Nailar, ha Jowai kan long ha ka 06 Nailur, bad khatduh ha Shillong ha ka 20 tarik Nailur, 2025.
Ka por ba khatduh ban thep ïa ki aplikeshon kan dei 2 sngi shuwa ka tarik ban sdang ïa ka Talent Scout jong ki jaka ba la kdew.
Kane ka long katkum ka kyrwoh na u Secretary jong ka MRWA ha kaba ïadei bad ka jingthmu jong ka synjuk ban pynkhreh ïa ka kynhun ban mihkhmat ïa ka Jylla ha ki jingïalehkai Water Sports.
