Ba ïoh rung laitlan ki mynder Bangladeshi na khappud, lum jingïalang ki MLA ïa ki BSF bad Pulit

Mawsynram, Nailar, 19: U Bah Olansing Suin, MLA ka Mawsynram lem bad u Bah Pius Marwein, MLA ka Ranikor, ha ka 18 tarik ‘Nailar 2025, ki la lum lang ïa ki heh shipai jong ki 16 tylli ki Border Outpost (BOP) jong ka Border Security Force (BSF) kaba kynthup naduh Mawsynram haduh Ranikor, ryngkat ruh bad ki heh pulit jong ka thaiñ, ban ïa kren bad twad jingmut halor ka jingïoh rung laitlan jong ki nong Bangladesh hapoh u pud u sam jong ka Ri India, kaba la buh jingma ïa ka jingim jong ki paitbah nongshong shnong ha kitei ki thaiñ.
U MLA ka Ranikor, u bah Pius Marwein hadien ba la kut ka jingïalang, haba ïakren bad ki lad pathai khubor u la pynpaw ba ka nongrim jong kane ka jingïalang ka dei ban ïohsngew ïa ka sur jong ki BSF bad ki pulit halor ka daw kaba la pynlong ïa ki khar Bangla ban ïoh rung laitlan hapoh India ban leh ïa ki kam tuh, ban pyntriem, ban lute bad ban rahbor ïa ki nongshong shnong. U la ong ruh ba ki BSF ki la pynpaw ïa ki jingeh kiba ki shem, khamtam ha ki bynta ba la pra ki jingker sainar shiah, ha ki jaka ba don ki wahbah bad ki jaka ba eh ban leh ïa ka jingpahara, khamtam ha ki por slap bad lyer. Nangta ruh, u la pynpaw ba ki BSF ki la kular ba kin trei shitom 24 kynta ban nym ailad ïa kino kino ki nong Bangladesh ban rung tuh sha India.
Katba ha ka jingkren jong u MLA ka Mawsynram, u bah Olansing Suin, u la ong ba kum ki nongmihkhmat paidbah ki sngewkhia bha ïa kane ka jingeh namar ba ka jinglong jingman hapoh Bangladesh mynta ka la sniew palat, kaba la pynlong ïa bun ki nong Bangladesh ban rung tuh sha India tang ban lait im. Kane ka dei ruh kaba la pynshisha da ka jingïoh kem ïa shibun ki nong Bangladesh kiba la wan laitlan sha ka ri.
Shuh shuh u bah Olansing Suin u la ïathuh ruh ba ki la ïa kren halor ka kamram jong ka BSF ban nym pynsuhthied ne pynshlur ïa ka jingwan rung tuh, ka jingkhaïi drok, ka jingkit tiar siat bad kino kino ki tiar ïaleh.
Ym tang kata, u bah Olansing Suin u la bynrap ruh ba na ka liang jong ki baroh ar ngut ki MLA ki la bthah ïa ki BSF ba haba ki leh ïa ka jingtalasi, kim dei ban pynwit ne pynthut ïa ka jingim bad ka jingïaid ka ïeng jong u paidbah, hynrei kin trei da ka rukom kaba pynlong ïa ki paidbah ban ïatreilang bad ban ïaineh jingmut. Ki la ong ruh ba lada don kino kino ki jingjia, khlem ka jingïatreilang bad ka jingïaishah jong ki paidbah, ka jingtreikam jong ki BSF bad ki pulit kan sa long kaba eh.