Kyntu ki MDC Liang pyrshah ïa KHADC ba ka dei ban shimkhia na ka jingwan rung kyrthep ki mynder

Shillong, Nailar 19: Ki MDC ka Liang pyrshah hapoh ka jingialam jong u Bah T W Chyne kum u nongialam ka liang pyrshah u la ïathuh ba ki MDC ha ka jingiakynduh bad u CEM ha ka sngi baar ki khlem ïakren ruh tang halor ki skhim hynrei halor ka kam wanrung kyrthep ki mynder haba la ïohi ba ka sorkar Assam ka la kyndang ïa ki bym dei ki nong India bad mynta kine ki la sdang ban wan rung ban krih hapoh ki shnong ki thaw ka jylla Meghalaya khamtam ha u pud u sam ka KHADC.
Ha kaba ïadei bad kane ka jingeh na ka liang ki MDC ki la leit ban pan jingshai na u CEM haba ïadei ba ki kam jong ka EC aïu ka la leh ha kaba ïadei bad kane ka bynta, bad la ïoh ka jubab ba ka EC ka la dep phah ka shithi sha ki Khlieh Nongsynshar bad ban ong ba kin long kiba adkar ha la ki shnong ki shnong bad kumjuh ruh ba kin long kiba peitngor.
“Halor kane ka kam rung beaiñ ki mynder tang ka phah ka shithi kam pat biang, kumta na ka liang jong ngi, ngi la ai jingmut ba kane kam pat biang hynrei dei ban khot ka jingïalang jong baroh ki khlieh nongsynshar, ki rangbah shnong ban ïakren kumno ban tehlakam ïa ka jingwan rung ki briew kiba nabar ha ki shnong ki thaw, khamtam ha ki jingai wai ïing, na ka liang u CEM u la kubur ban khot da ka jingïalang bad ba ki MDC ruh kin donlang ha kane ka jingïalang ban ai jingmut,” bynrap u Bah Chyne.
Haba ïadei bad ka jingjia kaba dangshen ha Ranikor bad Mawsynram ha kaba ki nong Bangladeshi ki la wan thombor ïa ki nongshong shnong bad ia ki nongialam shnong ha kane ka thaiñ, halor kane u Bah Titos u la ong, “Kane ka kam rung kyrthep ki mynder sha kine ki pud ki sam mynta ka la long international kumta donkam pat bha ban shim khia, khamtam na ka KHADC ban pynsted ïa kane ka kam,” u la ong.
U la ïathuh ruh ba mynta la ïohi ïa ka jinglong kloi jong ki sengbhalang ban kyndang bad talasi ïa ki mynder ha ki shnong bad ki jaka bapher bapher khnang ban tehlakam ïa ka jingwan rung kyrthep ki mynder sha kane ka jylla Meghalaya.