Shillong, Nailar 19 : Mynta ka sngi ka Dorbar Shnong Umshing-Mawkynroh kala jam sha uwei u mawmer da ka jingplie paidbah ïa ka Community Hall ne ka ïing Dorbar ba thymmai da u Myntri Rangbah ka Jylla Conrad K Sangma.
Ha kane ka jingiïalang la ïadonlang ki nongïalam ka Shnong, ki nongshongshnong bad ki khynnah skul na ka St.Luke bad ka Grace Academy.
Haba ai jingkren, u Myntri Rangbah ula pynpaw ïa ka jingsngewnguh halor ka jingpdiang burom ïa u bad ïaroh ïa ka shnong namar ka sienjam ban pynlong ïa ka project kaba seisoh. Ula kren halor ka bynta jong ka Chief Ministry’s Special Development Fund (CMSDF) ban kyrshan ïa ki jaka pule bad ki shnong ki thaw hapoh ka Jylla.
U Myntri Rangbah ula kular ruh ban nang bteng ha kaban ai jingkyrshan ïa ki samla ka shnong kynthup ka jingai ïa ki tiar ïalehkai, ki tiar put tiar tem bad ki jingai jinghikai na ka bynta ki nongseng kam bad ki nongrep.
U Myntri Rangbah ula pynshlur ruh ïa ka shnong ba kan pynlong ïa ka hall kum ka jaka pdeng jong ki kam ban tei bad ba don jingmut, haba pynthikna ba ki samla ki ïoh ïa ki kabu ba kin kiew, ki long kiba donsap bad ban tei ïa ka sap ba ki don.
ïa kane ka sngi la pynshong kun da ka jingshim bynta jong ki khynnah ka St.Luke bad Grace Academy ban rwai ïa ka jingrwai “Ri Lum” kaba la ïoh ïa ka jingïaroh bad ka jingthapkti kaba jam na ki paidbah.
