Tang na i shi kol u Redeem Tlang rung suk ka NorthEast United sha ka final Durand Cup

Shillong, Nailar 19 : Ka NorthEast United FC ka la rung biang mynta sha ka final jong ka Durand Cup hadien ba ka la lah ban pynliem noh ïa ka Shillong Lajong FC da tang 1-0 kol ha ka jingïakhun ïa ka semi final kaba itynnad bha kaba long ha madan JN Sadium Polo ha ryngkat ka jingsakhi da ki phew hajar ngut ki nongkyrshan.
Ïa kane ka kol kaba kongsan tam jong ka NorthEast la ïoh ban thep da u samla ïalehkai na ka jylla hi u Redeem Tlang uba la ïoh ban pynkhih jar tang ha ka minit kaba 36 jong ka kylla step, ha ka por ba ka jingïakhun ka la long kaba shongshit bha.
Da kane ka jingjop mynta, ka NorthEast kan hap pat ban ap ïano kan hap ban ïa khun ïa ka final namar ïa ka semi final kaba ar yn pynïakhun ha ka janmiet sngi Balang kaban long hapdeng ka East Bengal pyrshah ïa ka Diamond Harbour.
Haba poi biang sha ka jingïakhun ha ka semi final kaba nyngkong, u Coach ka Shillong Lajong u la pynïalehkai da ka rukom 4-3-3 da kaba wanrah ïa u Phrangki Buam, Everbrightson Sana bad u Sheen Stevenson ha kaba u Damaitphang Lyngdoh, Gladdy Kharbuli bad Figo Syndai uba la mih ha jaka u Treimiki Lamurong kum ki rangïalehkai pdeng. Ïa ki rangap dien pat la ailad ïa u Rudra Ved bad Kenstar Kharshong hapdeng katba u Kitboklang Khyriem bad Saveme Tariang kum ki nongïarap katba u Siwel Rymbai kum u rangap kol.
Na ka liang u Coach ka NorthEast United, u Juan Pedro Benali u la buh nakhmat eh ïa u rangthep kol ba kynsai eh u Alaaeddine Ajaraie ryngkat bad u Chema Nunez, Jithin M.S bad u Lalrinzuala Lalbiaknia kum ki nongthep kol.