Shillong, Nailar 18: Ka jingïakhun final jong ka lympung phutbol jong ka Umrynjah Sports Club ka la long kaba itynnat bad shongshit hadien ba ka jingïakhun hapdeng ka Shi Dong FC bad ka Kynhun Misteri FC ka la long kaba ïakhaid bad ïa ryngkat bor.
Hynrei ka shi kol jong u Closing Lyngshing ka la pynskhem ïa ka Shi Dong FC na Umktieh ban rah ïa ka nam lahduh da kaba pynliem ïa ka Misteri FC na Umroi da tang 1-0 kol ha ka final ha madan jong ka Umrynjah SC ha ka sngi Saitjain ka 16 tarik u Nailar, 2025.
Kum ka Lahduh ka Shi Dong ka la ïoh khur ïa ka song pisa kaba 20,000 tyngka bad ka kynhun Misteri kaba wan ba-ar ïa ka khusnam pisa kaba T.10,000 tyngka.
Ha kane ka lympung ki don baroh 32 tylli ki kynhun ba la wan ïa shim bynta bad ha ka sngi pynkut la wan Kongsan da u Bah PT Sawkmie.
Haba ai jingkren shuwa ban sdang ka jingïakhun u President ka Umrynjah SC u bah J. Umdor u la ai khublei ïa u Bah PT Sawkmie watla um long shuh u MLA hynrei u long la kloi ban kyntiew ïa ki khun samla da ka jingai jong u ïa ka kti ka diang kti kamon ban kyrshan ïa ki.
Na ka liang u Bah PT Sawkmie haba kren kum u kongsan u la pynpaw ba watla um long MLA shuh, u sngewnguh pat ïa ki paidbah kiba la pynjop ïa u saw samoi, lai sien kum u MLA bad shisien kum u MDC, kumta kam mut ba un kyntait ban shim ïa ka phun lada don kam ba kwah jingïarap, hynrei u long ba la kloi ban noh synñiang katba lah ban ïarap namar u dei u nongmihkhmat ba U Blei u la jied ïa u ban shakri paidbah.
Kumba shu kdew ka Umrynjah SC ka dei ka club kaba la kham paw bha mynta, ka ïakhun ïa ka lympung phutbol Third Division jong ka Shillong Sports Association ha Polo bad ka don bun bha ka jingkyrmen ba ka lah ruh ban kiew sha ka kyrdan 2nd Division ban ïalehkai ha u snem ban wan.
