Bang bha ka bam ha Police Station ba rim, kylla jaka bam ba shngiam ka thanad ba la 140 snem

Sohra, Nailar 17 : Bun bha ki paidbah ki tip shaphang ka thain Sohra namar ka jingdon ïa ki jaka jngohkai pyrthei kiba itynnad bad khamtam eh na ka jingïoh ïa ka nam kum ka jaka ba jur slap tam ha ka pyrthei.
Hynrei mynta kane ka thain ka la wanrah sa kawei pat ka nam, kata da ka jinglah ban pynkylla ïa ka thanad kaba la 140 snem mynshwa sha ka jaka bam kaba khring lut ïa baroh ki nongjngohkai. Ïa kane ka jaka bam la tip kum ka Sohra 1885 Cafe.
Kane ka Cafe ym tang ba ki lah ban pynbiang ïa ka bam kaba shngiam hynrei ki dang pynneh pynsah ruh wat ïa ki tiar bad ki jingbuh jingsat kiba pyndonkam naduh katei ka por.
Na ka bynta kane ka jingkylla baroh, ka burom ka leit sha ka Meghalaya Police kaba la kyrshan ïa ka jingai jingmut ba tyrwa da u SP ka East Khasi Hills Bah Vivek Syiem naduh ka por ba u bat kum u DSP ka distrik
Une u heh pulit u la ong ba la slem u la thrang ban tyngkai bad pynneh pynsah ïa katei ka police station kaba la rim tam ha ka jylla.
“Nga ju kwah barabor ban leh ei ei ban pynsahnam ïa kane ka police station kaba la rim bad hyndai tam ha ka jylla. Kum kine ki jingtei kim da don shuh ha ka jylla kiban don bad ka khana pateng,” ong u Bah Vivek Syiem.
Une u heh pulit u la ïathuh ruh ba kane ka jingmut ban pynkylla dur ïa kane ka along kaba don naduh ka por jong ki phareng ka la sdang ha ka por ba u dang bat kum u DSP ha ka distrik. “Naduh katei ka por hi nga la tip ba kane ka jaka kan sa khring bun bha ki nongwna kai kiba wah ban ïohi bad wan jngoh,” u la ong.
Wat na ka liang u SP ruh u da ïaroh ïa kane ka sienjam ba la shim da kane ka kynhun kaba shimti ban pynïaid ïa kane ka jaka bam khamtam namar ka jinglah jong ki ban pynkylla dur bad pynitynnad shuh ïa kane ka jingtei kaba rim.
“Wat ïa ka dpei ding la dep ban shna pynbha shuh shuh na kaba long mynshwa. Ki jingsiang ha madan ki long kumba ki long mynshwa namar ki dang bha haduh mynta,” u la ong.
Kumta hadien ba la ïaid ka kam, ka kynhun ki nongtreikam lajong ki la mih ban pynwandur thymmai ïa kane ka jingtei ba rim bad pyndait artad da ka kyrteng ‘Sohra 1885’.
Na ka liang i samla Nafi Nongrum kum i nongpynïaid i la ïathuh ba ki la pynthymmai lut ïa ka jingtei baroh kynthup ïa ki tiar ki tar ba la don naduh ka por jong ki dohlieh ha katei ha police station.
Ka la ïathuh ruh ba ki la pynkylla ïa ki patok kaba ju set ïa ki koidi kynthei bad shynrang ban long noh kum ka jaka bam bad ki nongwan bam ruh ki kmen bha.
Ka samla Nafi ka la pyntip ruh ba katei ka jaka bam ja ka lah ruh ban ngiam haduh 100 ngut ki nongbam ha ka shisien bam.
Ïa kane ka jaka bam la plie paidbah ha ka 22 tarik Jymmang mynta u snem.
Ka samla Nafi ka la ïathuh ruh ba ïa kawei ka synduk buh tiar kaba khia haduh 200 kilo la dep ban pynkhuid bad pynbha nalor ba la airong thymmai. Katkum ka jingïathuh jong ka, kane ka synduk ka dei kaba khia bha namar donkam haduh 7 ngut ki nongtrei ban rah ïa ka na madan sha ka jaka buh ba la shna.
“Kumba phi ïohi, ngi la lah ban pynkylla ïa ka along kawei kaba ju set ïa ki shynrang bad kawei pat kaba set ïa ki kynthei, sha ka jaka bam jingbam. Bun bha ki paidbah ki sngewtynnad ban wan bad bam ha kine ki jaka ba la pynwandur itynnad bha mynta,” ka la ong.
Na ka liang ki nongbam ruh ki la pynpaw ïa ka jingsngewkmen ban ïohi ba ka police station kaba la rim tam ha ka jylla kan kylla long ka jaka bam ba pawnam tam ha ka jylla.