Shillong, Nailar, 13: Ka jinglip bording ba khah khah ha them Ribhoi ka la pynbitar shla ïa ki paidbah nongpyndonkam ïa ka bording bad ka la don ruh ka khep ba ka Synjuk ki Rangbah Shnong Ribhoi District ka la byrngem wat ban khang tala noh ïa ka ophis treikam jong u Superintending Engineer ka Meghalaya Energy Corporation Limited (MeECL) kaba don ha Umïam namar ka jingbymlah ban ai ïa ka jingshakri kaba pura.
U Secretary jong ka SRSRBD u Bah PB Sylliang ha ka jingïakren bad ki lad pathai khubor u la ïathuh ba ha ka jingïakynduh ïa u Myntri ka tnat Bording ka Sorkar Jylla u Abu Taher Mondal ha ka sngi Balang u la kular ba ka Sorkar kan sa shimkhia ïa ka jinglip bording ba khah khah ha them Ribhoi.
“Ngi shaniah ïa ka jingkular jong u Myntri bad ngi ngeit skhem ruh ba ka jingkular jong u kan urlong kumba u la kren,” ong u Bah Sylliang haba pyntip ba ka jinglip khah khah ka bording ka long tang shu hap slap, wat haba shit ka sngi.
