Jowai, Nailar 13: Ka Dorbar Chnong Tympang Ïawmusiang, Jowai, kum shi bynta ban ai jingkyshan ïa ka Khooid Ya Ka Wah Myntdu, ha ka jinglamkhmat u ma Khroo L Pariat President KYM, ban ïakhun ha NGT Principal Bench New Delhi, na ka bynta ban ïoh ïa ka hok jong ka Wah Myntdu kaba pynbiang ïa ka um bam um dih, ka bording, kaba ïarap ïa ka khyndew ka lyer, ïa ki paidbah nongshong shnong ka nongbah Jowai bad kiwei kiwei de ki shnong kiba shong ba sah sawdong jong ka Wah Myntdu.
Kumta ha ka jingïalam u ma A. Lywait Waheh Shnong ryngkat u ma H. Laloo General Secretary bad kiwei kiwei de ki rangbah ka shnong Iawmusiang ki la ai ka jingïarap da ka pisa kaba 20,000.00 (Ar phew hajar) tyngka, ha kane ka 13.08.2025, ïa kaba la aiti ha u ma Khroo L Pariat President Khooid Ya Ka Wah Myntdu, kaba long kum ka dak ka jingkyrshan lang jong ka shnong.
Ka shnong Iawmusiang ka khmih lynti ruh ba ka NGT Principal Bench New Delhi, kan pynïoh ne ai ïa ka hok ka Wah Myntdu na ka bynta ka jingshngaiñ ka imlang sahlang bad ka longbriew man briew.
Ha kane ka sngi la don lang ruh u ma R. Lamar, ma GH Bareh, ma E. Niangti, ma E. Dkhar bad kiwei de ki rangbah ka Iawmusiang bad KYM.
