Nongstoiñ, Nailar, 13 : Mynta ka sngi ba ar 12 tarik Nailar, ka ophis jong ka DDMA West Khasi Hills District, ka la pynlong ïa ka jingïalang plie paidbah halor ka National Awareness Campaign on Lightning Safety hapoh ka Mitigation Project on Lightning Safety (MPLS), kaba la pynïaid da ka National Disaster Management Authority (NDMA). Ïa kane ka prokram la pynlong hapoh ka ophis u Deputy Commissioner West Khasi Hills District, Nongstoiñ.
La plie ïa kane ka prokram da u Bah S. Marweiñ MCS, Additional Deputy Commissioner-cum-CEO (DDMA) ha ka jingdonlang jong u District Disaster Management Officer, ki Block Development Officer (BDOs) bad ka Awareness Team.
Ka thong jong kane ka campaign ka long ban ai jingtip ïa ki paidbah shaphang ka jingma jong u pyrthat bad ki leilieh bad ki lad ban sumar na ka jingshah ktah.
Kum shibynta jong kane ka jingpynsngew paidbah, yn pynlong ïa ki prokram ai jingtip ha ka Shnong Umdang hapoh Mawshynrut C&RD Block, kumjuh ruh ha ka Shnong Tiehbah hapoh Nongstoiñ C&RD Block bad ha ka shnong Steplanglur.
Nangta ha Nongkroh-Rambrai hapoh Rambrai C&RD Block bad yn pynïaid da ka M/S Panchtatva Advertising New Delhi, ha ryngkat ka jingïatreilang bad ka District Disaster Management Authority, West Khasi Hills, bad ki ophis jong ki Block hapoh ka District.
