Shillong, Nailar 13: U Working President jong ka Meghalaya State Olympic Association [MSOA] u Bah John F Kharshiing, hynnin ka miet u la pyntip ba ïa ka thup jong ki jait jingïalehkai (Olympic & non Olympic Sports) ki ban pynrung ha ka National Games 2027, kaba ka Meghalaya kan sa ïoh ban pynlong, yn sa pynbna shuwa ha u bnai Nailur ne Risaw.
La khmihlynti ruh ba ka President jong ka Indian Olympic Association ka PT Usha, kaba dei ka nongïalehkai barim ba pawnam ka lah ban wan sha Shillong ha u bnai ban wan ban ïakren ïa ki mat bad ka sorkar Meghalaya bad ka MSOA ha kaba ïadei bad ka 39th National Games 2027.
ïa kane la pyntip sha u Bah John F Kharshiing bad u General Secretary ka MSOA u bah Finely L Pariat hynnin ka sngi ha ka jingïakynduh lang ha Olympic Bhavan ha New Delhi bad u CEO ka IOA u Raghuram Iyer bad u Executive Assistant ka Usha u Capt Ajay Narang.
Ha kane ka jingïalang, la pyntip sha ki heh nongïalam jong ka MSOA ba ka IOA kan ai ïa ki jingai jingmut ba shipor bad ka jingpynïaid ha kaba ïadei bad ki jingïalehkai, ha kaba ka kynhun synshar jong ka ri India kan kham pynleit jingmut ha ki jingïalehkai kiba long shi bynta jong ka prokram Olympic.
Lah ban kdew ba ka Meghalaya kan kwah ban kynthup ïa ki katto katne ki jingïalehkai kiba kan kham ïoh lad ban khur takma, kum ka Karate. Katba ka karate ka dei ka jingïalehkai ha ka Tokyo Olympics 2020 (ka Japan kaba dei ka jaka tynrai jong ka jingïalehkai) kam shym la shah kynthup ha ka Paris Games 2024 bad kan ym don ruh ha u snem 2028.
Nangta ki don ki jingïalehkai tynrai jong ka ri ‘India’ kum ka kabaddi, ka kho kho bad ka yogasana. Kine ruh ki dei ki jingïalehkai ki bym dei ki jingïalehkai Olympic lane non-Olympic disciplines bad ki don tang khyndiat ne ym don nongbud ha Meghalaya hynrei ki nongpynïaid ki lah ban kynthup lang ïa ki namar ki dei ki jingïalehkai tynrai jong ka ri.
