Jowai, Nailar 13: Ka kynhun ïalehkai jong ka Lumpyrtuh bad ka Mynsngat kin ïaknieh ïa ka nam lahduh haka lympung ïalehkai phutbol ‘Independence Day Cup Under-17 Football Tournament 2025’ bala pynïaid da ka West Jaiñtia District Sports Association (WJDSA) mynta u snem.
Haba phai sha ka jingïakhun Semi Final mynta ka sngi 13 tarik u Nailar ha madan Kiang Nangbah Stadium Dongmihsngi, Jowai haka jingïakhun kaba nyngkong ka Lumpyrtuh kala jop da ka jingïashut Tie Breaker da 4-1 kol ïa ka Loomïongkjam.
Haka jingïakhun kaba ar hapdeng ka Mynsngat bad Khimusniang kila ïakhaid da mar shikol (1-1) hapoh ka por jong ka jingïakhuh, ïa ka kol na ka Mynsngat la thep da u Wallam Mukhim haka minit ba 28 bad na ka Khimusniang la thep da u Esbunmiki Rymbai haka minit ba 60+1. Hadien kane ka jingïakhaid la pynïashut da ka Tie breaker ha kaba ka Mynsngat kala jop da 4-2 kol.
Ka jingïakhun Final ka long ha ka sngi 15 tarik Nailar, 2025 kaba dei ka sngi laidluid jong ka Ri India hadeng ka Lumpyrtuh bad ka Mynsngat.
