Shillong, Jylliew, 26: U Myntri Rangbah ka Jylla u Conrad K. Sangma ha ka Sngi U Blei u la ong ba u (L) Purno Agitok Sangma u tip shai ba un ym jop ïa ka elekshon President hynrei ka jingïashim bynta ha ka elekshon ka long ban pyni ba ki riewlum ki lah ban kiew sha kane ka kyrdan.
U la ong ka jingïakhun jong u Purno Sangma ha ka elekshon President ka long kum u kyrwoh uba shai sha ki paid riewlum ba kim dei shuh kiba dang shah ieh shadien bad ki don lut ïa ki hok ban ïakhun na ka bynta ka shuki synshar kaba heh tam ha ka ri.
Haba kren ha ka 8th Biennial Conference jong ka All Rabha Students Union of Meghalaya cum 4th Baiko Dera Festival kaba la long ha Manikganj, North Garo Hills, u la ong, “ka jingphohsniew jong u (L) P.A Sangma ka la kylla long kaba shisha bad kan long ruh ka jingsngewsarong ïa ki paid riewlum. Ha u snem 2012, u Purno Sangma u la long u Kyrtong ka NDA bad bun kim shym la kyrshan ïa u, hynrei mynta ka NDA ka la don ha ka jingbunpaid bad ka jingangnud ban wanrah da ki riewlum ha ka shuki President jong ka ri India ka la long kaba seisoh.”
U la ai khublei ïa u Myntri Rangbahduh ka ri u Narendra Modi uba la jied ïa ka Draupadi Murmu kum ka kyrtong na ki riewlum bad ong, “ka long kum ka jingithuh ïa ki riewlum ritpaid ha kane ka ri.”
Haba ïaroh ïa ki jaidbynriew Rabha kiba sah ha Meghalaya kiba ju ïatreilang u la ong, “kum ka Sorkar ngi don ka jingnangnud ban pynneh pynsah ïa ka shongsuk shongsaiñ bad ban kyntiew ïa ka ïoh ka kot hapoh ka jylla.”
U la ong ba ka kolshor bad ka mynnor jong ki paidbah ka long kaba kongsan bad ka jingwan jong ka teknologi ka la pynkylla dur ïa ka imlang ka sahlang hynrei ka long kaba donkam pat ban tip ïa la ka thymmei khnang ban pynneh pynsah ïa la ka riti ka dustur.
Ha kane ka jingïalang, la ai jingkren ruh da u Deputy Speaker jong ka Ingdorbar Thawaiñ u Timothy D Shira, ki MLA u Marton Sangma bad u Rupert Momin.
